ایرانی میزائل تجربات پر سلامتی کونسل کا مشاورتی اجلاس کل طلب کرلیاگیا

ہفتہ 12 مارچ 2016 19:37

واشنگٹن(اُردو پوائنٹ اخبارتازہ ترین - این این آئی۔12 مارچ۔2016ء)امریکا نے ایران کی جانب سے بیلسٹک میزائلوں کے تازہ تجربات پر سلامتی کونسل سے صلاح مشورہ شروع کر دیا ہے۔ غیرملکی خبررساں ادارے کے مطابق اقوام متحدہ میں امریکی سفیرہ سامنٹا پاور نے سلامتی کونسل کو درخواست دی ہے کہ وہ ایران کے بیلسٹک میزائل تجربات پر آئندہ پیرکے روز مشاورتی اجلاس طلب کیاجائیگا اس اجلاس میں اس بات پر غور کیا جائے گاکہ آیا تہران کے بیلسٹک میزائل تجربات جوہری معاہدے کی خلاف ورزی کے زمرے میں آتے ہیں یا نہیں۔

(جاری ہے)

واشنگٹن میں ایک نیوز کانفرنس سے خطاب کرتے ہوئے امریکی سفیرہ کا کہنا تھا کہ بیلسٹک میزائلوں کے تجربات سے امریکا کو گہری تشویش ہے۔ ایران نے تازہ تجربات سے امن و استحکام کے حوالے سے کئی سوالات اٹھا دیے ہیں۔ امریکا ان تجربات کو اشتعال انگیزی قرار دیتا ہے۔خیال رہے کہ سلامتی کونسل ایران کے لیے جوہری وار ہیڈ لے جانے کی صلاحیت رکھنے والے تمام اقسام کے میزائلوں کی تیاری اور ان کے حصول پر پابندی عاید کر چکی ہے۔ گذشتہ ہفتے ایران نے بیلسٹک میزائلوں کے دو تجربات کیے جس پرعالمی برادری کی جانب سے شدید رد عمل سامنے آیا ہے۔