Live Updates

وزیر اعلیٰ سے ترک سرمایہ کاروں کی ملاقات ، ترک سرمایہ کاروں کا پنجاب میں شعبہ ٹرانسپورٹ میں سرمایہ کاری کا اعلان

ترک سرمایہ کار جدیدییلو کیب گاڑیاں چلانے میں سرمایہ کاری کریں گے ترک سرمایہ کاروں کی جانب سے پنجاب میں ٹرانسپورٹ کے شعبے میں سرمایہ کاری کا خیر مقدم کرتے ہی،ییلوکیب گاڑیاں چلانے کے ضمن میں ترک سرمایہ کاروں کو ہر ممکن سہولتیں دیں گے، وزیر اعلی شہباز شریف کی سرمایہ کاروں کے وفد سے گفتگو ترکی اور پاکستان کے درمیان تعلقات میں اضافہ کیلئے وزیر اعلیٰ شہبازشریف نے گرانقدر کام کیا ہے،ترک سرمایہ کاروں کا اظہار خیال

بدھ 10 فروری 2016 22:27

وزیر اعلیٰ سے ترک سرمایہ کاروں کی ملاقات ، ترک سرمایہ کاروں کا پنجاب ..

لاہور(اُردو پوائنٹ اخبارتازہ ترین - آئی این پی۔10 فروری۔2016ء ) وزیر اعلیٰ پنجاب محمد شہباز شریف سے بدھ کو یہاں ترکی کے سرمایہ کارگروپ کے وفد نے ملاقات کی جس میں ترک سرمایہ کاروں کے گروپ پنجاب میں شعبہ ٹرانسپورٹ میں سرمایہ کاری کا اعلان کیا-ترک سرمایہ کار پنجاب میں جدید ییلو کیب گاڑیاں چلانے میں سرمایہ کاری کریں گے۔وزیراعلیٰ نے جدید ییلو کیب گاڑی میں بیٹھ کراس کامعائنہ بھی کیا ۔

(جاری ہے)

وزیراعلی محمد شہباز شریف نے ترک سرمایہ کاروں کے وفد سے گفتگو کرتے ہوئے کہا کہ پاکستان اور ترکی دوستی کے لازوال رشتے میں بندھے ہوئے ہیں- دونوں ممالک کے مابین گہرے تہذیبی، ثقافتی اور تاریخی تعلقا ت قائم ہیں - انہوں نے کہا کہ پاکستان اور ترکی کے مابین تاریخی برادرانہ تعلقات مفید معاشی تعاون میں بدل چکے ہیں-دونوں ممالک کے عوام کے دل ایک ساتھ دھڑکتے ہیں اور مشکل کی ہر گھڑی میں دونوں ممالک ایک دوسرے کے ساتھ کھڑے رہے ہیں- انہوں نے کہا کہ ترکی کی متعدد کمپنیاں پنجاب میں ٹرانسپورٹ، انفراسٹرکچر اور دیگر شعبوں میں سرمایہ کاری کر رہی ہیں جن سے پاکستان اور ترکی کے مابین معاشی تعلقات مضبوط ہوئے ہیں- انہوں نے کہا کہ پنجاب حکومت صوبے کی عوام کو ٹرانسپورٹ کی معیاری ، آرام دہ ، محفوظ اور باکفایت سفری سہولتوں کی فراہمی کے لئے اربوں روپے کے منصوبے مکمل کئے ہیں- ترکی کے تعاون سے چلائی گئی میٹرو بس سروس نے ٹرانسپورٹ کے کلچر کو بدل دیا ہے اور اس جدید سروس سے روزانہ لاکھوں افراد مستفید ہو رہے ہیں- انہوں نے کہا کہ ترک سرمایہ کاروں کی جانب سے پنجاب میں ٹرانسپورٹ کے شعبے میں سرمایہ کاری کا خیر مقدم کرتے ہیں - ییلوکیب گاڑیاں چلانے کے ضمن میں ترک سرمایہ کاروں کو ہر ممکن سہولتیں دیں گے- ترک سرمایہ کاروں نے اس موقع پر اظہار خیال کرتے ہوئے کہا کہ وزیر اعلیٰ شہباز شریف کی انتھک محنت اور غیر معمولی صلاحیتوں کے معترف ہیں- پنجاب کے عوام شہبازشریف سے دلی محبت اور ان کے کام کوپسند کرتے ہیں - ترکی اور پاکستان کے درمیان تعلقات میں اضافہ کیلئے وزیراعلیٰ شہبازشریف نے گرانقدر کام کیا ہے -خواجہ احمد حسان،ایم این اے مہراشتیاق احمد،کمشنر لاہور ڈویژن،ایم ڈی پنجاب ماس ٹرانزٹ اتھارٹی،ڈی سی او لاہور اور متعلقہ حکام بھی اس موقع پر موجود تھے ۔

Live وزیراعظم شہباز شریف سے متعلق تازہ ترین معلومات