لاہور سمیت پنجاب کے بیشتر میدانی علاقوں میں شدیددھند‘موٹروے بند‘ایئرپورٹ پر فلائٹ آپریشن معطل‘

Umer Jamshaid عمر جمشید بدھ 9 دسمبر 2015 12:09

لاہور سمیت پنجاب کے بیشتر میدانی علاقوں میں شدیددھند‘موٹروے بند‘ایئرپورٹ ..

لاہور(اُردو پوائنٹ تازہ ترین ۔۔ آئی پی اے ۔۔09 دسمبر۔2015ء) صوبائی دارالحکومت لاہور سمیت پنجاب کے بیشتر میدانی علاقوں میں بدھ کی صبح پھر دھند چھائی رہی‘بیرون ملک سے لاہور آنے والی پروازوں کا رخ دوسرے شہروں کی جانب موڑ دیا گیا اورموٹروے کے کئی حصوں کو عارضی طور پر بند کردیا گیا‘ لاہور ایئرپورٹ پر حد نگاہ 50 میٹر سے کم ہونے کے باعث فلائٹ آپریشن رات گئے معطل کردیا گیا جبکہ ڈیرہ غازیخان میں دھند کے باعث ٹرین کی زد میں آکر 2 نوجوان جاں بحق ہوگئے۔

محکمہ موسمیات نے آئندہ چند روز میں پنجاب کے میدانی علاقوں ، پشاور اور سکھر ڈویژن میں شدید دھند پڑنے کا امکان ظاہر کیا ہے۔ لاہور سمیت پنجاب کے اکثر علاقوں کو رات گئے دھند نے اپنی لپیٹ میں لے لیا‘علامہ اقبال انٹرنیشنل ایئرپورٹ لاہور پرشدیددھند کے باعث فلائٹ آپریشن بدھ کی صبح تین بجے معطل کردیا گیا اور ابوظہبی ، استنبول ، ریاض اور مسقط سے آنے والی پروازوں کو دیگر شہروں کی جانب موڑ دیا گیا جبکہ علامہ اقبال ائیر پورٹ سے روانہ ہونے والی تین پروازیں منسوخ کر دی گئیں۔

(جاری ہے)

موٹر وے کے بعض حصوں کو بھی عارضی طور پر بند کرنا پڑا جبکہ جی ٹی روڈ پر ٹریفک انتہائی سست روی کا شکار رہی۔ شدید دھند کے باعث ٹرینوں کی آمد و رفت بھی متاثر ہوئی ہے۔ پشاور میں بھی شدید دھند نے ڈیرے ڈال رکھے ہیں جس سے معمولات زندگی معطل ہوکررہ گئے۔ ملتان ، پنڈی بھٹیاں ، ڈیرہ اسماعیل خان اور نواحی علاقوں میں بھی ہر طرف دھند ہی دھند ہے۔ محکمہ موسمیات کے مطابق ہفتہ اور اتوار کے دوران پنجاب کے میدانی علاقوں سمیت پشاور اور سکھر ڈویژن میں شدید دھند پڑنے کا امکان ہے۔ ترجمان نیشنل ہائی وے کا کہنا ہے کہ دھند کے دوران شہری فوگ لائٹ کا استعمال اور احتیاطی تدابیر اختیار کریں۔

متعلقہ عنوان :