روس نے بھارت کو سیاحت کیلئے غیر محفوظ مقام قرار دیدیا،سیاحوں کو سفر نہ کرنے کی ہدایت

روسی حکومت نے بھارت کو محفوظ سیاحتی مقامات کی فہرست سے نکال دیا

اتوار 29 نومبر 2015 13:43

ماسکو(اُردو پوائنٹ اخبارتازہ ترین - آئی این پی۔29 نومبر۔2015ء ) بھارت میں بڑھتی ہوئی انتہا پسندی اور غیرملکیوں کے ساتھ پرتشدد رویے کے باعث روس نے بھارت کو سیاحت کیلئے غیر محفوظ مقام قرار دیدیا ۔غیر ملکی میڈیا کے مطابق روسی انفارمیشن سینٹرنے اپنے شہریوں کیلئے ایک ہدایت نامہ جاری کیا ہے جس میں انہیں بھارت کا غیر ضروری سفر کرنے سے روک دیا گیا ہے۔

(جاری ہے)

روسی حکومت نے بھارت کو محفوظ سیاحتی مقامات کی فہرست سے نکال دیاہے اور بھار ت کو سیاحت کیلئے غیر محفوظ مقام قراردے دیا ہے۔ ہدایت نامے میں کہا گیا ہے کہ روسی سیاح بھارت اوربھارت کے ساحلی شہر گوا کا رخ نہ کریں۔روس کی طرف سے یہ پابندی اس وقت سامنے آئی ہے جب بھارتی انتہا پسندوں سے اپنی ہاکی ٹیم کی ہار برداشت نہ ہوئی اور ارجنٹائن کی ہاکی ٹیم پر ہوٹل واپسی کے دوران شدید پتھراؤ کیا تھا جس سے کھلاڑیوں میں سخت خوف و ہراس پھیل گیا تھا۔