پی ٹی آئی نے قومی اسمبلی کے حلقہ این اے- 122 کے ضمنی انتخابات کو بھی الیکشن کمیشن میں چیلنج کر دیا

مسلم لیگ (ن) کی دھونس اور دھاندلی کا پیچھا جاری رکھیں گے ٗگفتگو

جمعرات 26 نومبر 2015 17:18

اسلام آباد (اُردو پوائنٹ اخبارتازہ ترین - این این آئی۔26 نومبر۔2015ء) پاکستان تحریک انصاف (پی ٹی آئی) نے قومی اسمبلی کے حلقہ این اے- 122 کے ضمنی انتخابات کو بھی الیکشن کمیشن میں چیلنج کر دیا ٗتحریک انصاف کے امیدوار علیم خان کی جانب سے سلمان راجہ ایڈووکیٹ نے 800 صفحات پر مشتمل پٹیشن جمع کروا دی۔ میڈیا رپورٹ کے مطابق علیم خان نے کہاکہ تمام قانونی مراحل کے بعد الیکشن کمیشن سے رجوع کیا، اس بار ایاز صادق کے خلاف پہلے سے بھی ٹھوس شواہد موجود ہیں۔

الیکشن کمیشن میں تحریک انصاف کی جمع کروائی گئی درخواست میں کہا گیا کہ ضمنی انتخابات سے قبل 30 ہزار 500 ووٹ ٹرانسفر یا منسوخ کیے گئے۔کہا گیا کہ پی ٹی آئی کو صرف 812 فارمز کی تفصیلات فراہم کی گئی ہیں ٗ22 ہزار ووٹوں کے اندراج اور اخراج کی تفصیلات نہیں دی گئیں۔

(جاری ہے)

درخواست میں بتایا گیا کہ ایک ہی گھر میں 30 سے 50 ووٹوں کا اندراج کیا گیا۔درخواست دائر کرنے سے قبل علیم خان نے کہاکہ این اے- 122 میں ووٹوں کا اندراج اور اخراج اندھیرے میں رکھ کر کیا گیا ہے ٗعلیم خان نے کہا کہ نادرا حکام نے ملاقات کی اور نہ ہی ووٹرز کا ریکارڈ فراہم کیا ٗمسلم لیگ (ن) کی دھونس اور دھاندلی کا پیچھا جاری رکھیں گے، این اے-122 کے ضمنی انتخابات میں دھاندلی ہوئی، لہذا الیکشن کمیشن ازخود نوٹس لے کر انتخابات کالعدم قرار دے۔