لاہور ہائیکورٹ نے آئی جی کے خلاف دائر توہین عدالت کی درخواست پر جائزہ رپورٹ پیش کرنے کا حکم دے دیا

منگل 24 نومبر 2015 22:45

لاہور۔24 نومبر(اُردو پوائنٹ اخبارتازہ ترین - اے پی پی۔24 نومبر۔2015ء) لاہور ہائیکورٹ نے عدالتی احکامات کے باوجود ڈی ایس پی کیڈر کے پرموشن بورڈ کا اجلاس نہ بلائے جانے پر آئی جی پنجاب کے خلاف دائر توہین عدالت کی درخواست پر جائزہ رپورٹ پیش کرنے کا حکم دے دیا۔ جسٹس ساجد محمود سیٹھی نے کیس کی سماعت کی۔درخواست گزار ڈی ایس پی لیگل شاہد نواز نے موقف اختیار کیا کہ عدالتی حکم کے باوجود ڈی ایس پی لیگل کیڈر سے تعلق رکھنے والے پولیس افسروں کی ترقی کے لئے پرموشن بورڈکاجلاس نہیں بلایا جا رہا جو کہ واضح طور پر توہین عدالت ہے۔

(جاری ہے)

انہوں نے کہا کہ عدالتی احکامات نظر انداز کرنے پر آئی جی پنجاب کے خلاف توہین عدالت کی کارروائی عمل میں لائی جائے۔انہوں نے عدالت کو بتایا کہ عدالتی حکم نامے کے بعد جنرل اور ٹریفک کیڈر کے پرموشن اجلاس تو بلا لئے گئے مگر ڈی ایس پی لیگل کے پرموشن بورڈ کا اجلاس آج تک طلب نہیں کیا جا سکا۔ایڈیشنل آئی جی لیگل نے عدالت کو بتایا کہ پرموشن بورڈ کے اجلاس جلد بلایا جا رہا ہے۔جس پر عدالت نے درخواست گزار کی درخواست پر کارروائی کی ہدائت کرتے ہوئے ستائیس نومبر کو جائزہ رپورٹ عدالت میں پیش کرنے کا حکم دے دیا۔