اسٹیٹ بینک کل سے 5 روپے کا نئے سائز اور تبدیل شدہ بھرت کا سکہ جاری کرے گا

منگل 13 اکتوبر 2015 23:12

لاہور (اُردو پوائنٹ اخبار تازہ ترین۔ 13 اکتوبر۔2015ء )اسٹیٹ بینک آف پاکستان 5 روپے کا نئے سائز اور تبدیل شدہ بھرت کا سکہ جاری کرے گا، یہ سکے 15اکتوبر 2015 سے جاری کیے جائیں گے، سکے کا وزن 3 گرام ہے جس میں 79فیصد تانبا، 20فیصدجست اور ایک فیصد نکل ہے۔ اس کا قطر 18.5 ملی میٹر ہے۔

(جاری ہے)

سکے کے سامنے رخ پر وسط میں بڑھتا ہوا ہلال اور 5 کونوں والا ستارہ ہے جس کا رخ شمال مغرب کی طرف ہے، ستارے اور ہلال اوپر کنارے کے ساتھ ساتھ اردو میں اسلامی جمہوریہ پاکستان لکھا ہوا ہے، ہلال کے نیچے اور گندم کی بلائی کی طرف خم کھائی ہوئی دو بالیوں کے اوپر سن اجرا درج ہے، سکے کے اوپر کنارے پر دو چھوٹے دانوں کا دائرہ ہے، سکے کا پچھلا رخ دائروی صورت میں پھولوں سے آراستہ ہے یہ پھول وسط میں موجود پانچوں کونوں پر منقطع ہوجاتے ہیں، ستارے کے وسط میں سکے کے عرفی مالیت کا عدد 5 نمایاں صورت میں اور لفظ روپیہ اردو میں کندہ ہے۔

سکے کے اوپر کنارے پر دو چھوٹے دانوں کا دائرہ ہے۔ واضح رہے کہ 5 روپے کا موجودہ سکہ بھی قانونی ہے اور نئے سکے کے ساتھ وہ بھی بدستور گردش میں رہے گا۔