لاہور(اُردو پوائنٹ اخبار تازہ ترین۔ 13 اکتوبر۔2015ء) چیف جسٹس لاہور ہائی کورٹ مسٹر جسٹس منظور احمد ملک نے کہا ہے کہ وکالت کا پیشہ اپنانے والوں نے مسلمانوں کیلئے علیحدہ وطن کا خواب دیکھا اور پاکستان بنایا۔ وکالت کے پیشہ سے وابسطہ افراد دانشوروں کے دانشور ہوتے ہیں۔ انہوں نے کہا کہ ہمارا عدالتی نظام آئیڈیل نہیں، بنچ اور بار میں خامیاں ہیں، ہم نے ان خامیوں کو ٹھیک کرنا ہے بگاڑنا نہیں، ان کا کہنا تھا کہ وکیل کے ہاتھ میں کتاب اور قلم اچھے لگتے ہیں تالا نہیں اور منہ سے دلیل اچھی لگتی ہے گالی نہیں۔
فاضل
چیف جسٹس کل
لاہور بار ایسوسی ایشن کی دعوت پر ایوان عدل میں وکلاء سے خطاب کر رہے تھے۔ تقریب کا اہتمام
لاہور جوڈیشل کمپلیکس کی تعمیر مکمل ہونے، وکلاء کیلئے پارکنگ کی تعمیر اور وکلاء چیمبرز کا سنگ بنیاد رکھنے پرلاہور بار کی جانب سے فاضل
چیف جسٹس کو اخراجِ تحسین پیش کرنے کیلئے کیا گیا تھا۔
(جاری ہے)
اس موقع پر عدالت عالیہ کے سینئر ترین جج مسٹر جسٹس سردار طارق مسعود، مسٹر جسٹس اعجاز الاحسن، مسٹر جسٹس سید منصور علی شاہ، رجسٹرار ہائی کورٹ طارق افتخار احمد اور ڈسٹرکٹ اینڈ سیشن جج بہادر علی خان کے علاوہ ضلعی عدلیہ کے جوڈیشل افسران اور وکلاء کی بڑی تعداد بھی موجود تھی۔
فاضل
چیف جسٹس نے سول کورٹس میں ATM مشین اور اپ گریڈڈ لائبریری کا افتتاح بھی کیا۔فاضل
چیف جسٹس نے کہا کہ انسان کو عزت، احترام اور تعریف ملے تو خوش ہونا ایک فطری عمل ہے اور اگر یہ سب کچھ اپنے گھر سے ملے تو انسان بہت زیادہ پر اعتماد ہو جاتا ہے۔ انہوں نے کہا کہ
لاہور بار ایسوسی ایشن ان کیلئے ماں کا درجہ رکھتی ہے اور اس کی بہتری کیلئے اٹھائے جانے والے میرے اقدامات اور کاوشوں کو سراہنا میرے لئے بے حد خوشی اور مسرت کا باعث ہے۔
ان کا کہنات تھا کہ میں اپنی تمام تر کامیابیوں پر اللہ رب العزت کا مشکور ہوں اور اس پاک ذات کے بعد میں
لاہور بار ایسو سی ایشن کا ہمیشہ احسان مند رہوں گا جس نے مجھے نام، شناخت ، رزق اور عہدہ دیا۔فاضل
چیف جسٹس نے کہا کہ انہیں پنجاب کے تمام وکلاء سے بے حد پیار ہے لیکن
لاہور بار میں انکا قانونی جنم ہوا اور بطور وکیل یہاں پرورش پائی، انہوں نے کہا کہ انہوں نے اوائل میں بھوک بھی دیکھی، سختیاں بھی جھیلیں لیکن اللہ تعالیٰ اور اس بار پر توکل رکھا۔
فاضل
چیف جسٹس نے کہا کہ دنیاوی رشتوں میں واحد ماں ہے جو بدلہ نہیں چاہتی۔ ان کا کہنا تھا کہ بار کیلئے انہوں نے جو کچھ کیا وہ کوئی احسان نہیں یہ انکا اولین فریضہ تھا اور اپنے فرض کی ادائیگی پر وہ بہت خوش اور اللہ کے شکر گزار ہیں اور وہ خواہش رکھتے ہیں کہ اس بار کیلئے وہ مزید بہت کچھ کریں۔فاضل
چیف جسٹس نے کہا کہ جوڈیشل کمپلیکس کی تعمیر سمیت بار کی بہتری کیلئے اٹھائے جانے والے تمام اقدامات کے حوالے سے مسٹر جسٹس سید منصور علی شاہ نے بھرپورکام کیا۔
انہوں نے کہا کہ جسٹس سید منصور علی شاہ پنجاب کی عدلیہ کیلئے ایک اثاثہ ہیں جوہر وقت سسٹم اور وکلاء کی بہتری کیلئے کوشاں رہتے ہیں۔ان کا کہنا تھا کہ عدالت عالیہ میں کیس مینجمنٹ پلان کے قیام سے لے کر ضلعی عدلیہ میں لائی جانے والی تمام اصلاحات کا سہرا جسٹس منصورعلی شاہ کے سر ہے۔ فاضل
چیف جسٹس نے کہا کہ وہ آج بھی وکلاء کا حصہ ہیں اور وکیل ہونے پر فخر کرتے ہیں،انہوں نے کہا کہ میں
چیف جسٹس کا عہدہ تو چھوڑ سکتا ہوں مگر یہ قبول نہیں کہ وکلاء سے رشتہ توڑ دوں کیونکہ میرے جنازے کو کندھا وکلاء نے دینا ہے۔
چیف جسٹس منظور احمد ملک کا کہنا تھا کہ انہیں نوجوان وکلاء میں اپنا عکس نظر آتا ہے اور وہ نوجوان وکلاء کو ہمیشہ سراہتے اور انہیں سکھانے کی کوشش کرتے ہیں۔انہوں نے کہا کہ بطور جونیئر وکیل انکا یہ خواب تھا کہ ا سپیشل کورٹس سنٹرل اور بنکنگ کورٹس کی تعداد میں اضافہ ہو اور تمام خصوصی عدالتیں ایک جگہ یکجا ہوں اور آج وہ اپنے خواب کی تکمیل پر بہت خوش ہیں۔
فاضل
چیف جسٹس نے جوڈیشل کمپلیکس کی تعمیر اور وکلاء چیمبرز کی منظوری پرانتظامیہ کو بھی سراہا۔تقریب سے خطاب کرتے ہوئے مسٹر جسٹس اعجاز الاحسن نے کہا کہ فاضل
چیف جسٹس کی رہنمائی میں پنجاب بھر کی عدلیہ نے کثیر تعداد میں مقدمات کے فیصلے کئے اور تمام پرانے مقدمات کو میرٹ کے مطابق نمٹایا۔ انہوں نے کہا کہ فاضل
چیف جسٹس کی کاوشوں کی بدولت جوڈیشل کمپلیکس فیز ٹو کی تعمیر، پارکنگ اور وکلاء چیمبرز کی تعمیر سے سائلین اور وکلاء کو سہولت ہوگی جس سے نظام عدل میں بہتری آئے گی۔
صدر
لاہور بار ایسوسی ایشن چودھری اشتیاق اے خان نے جوڈیشل کمپلیکس کی جلد تعمیر، تمام عدالتوں کو یکجا کرنے، وکلاء کے لئے چیمبرز کی تعمیر کے سنگ بنیاد اور وسیع پارکنگ کی تعمیر پر فاضل
چیف جسٹس اور عدالت عالیہ کا شکریہ اداکیا۔تقریب سے ڈسٹرکٹ اینڈ سیشن جج بہادر علی خان نے بھی اپنے خیالات کا اظہار کیا۔ تقریب کے اختتام پر
لاہور بار کی جانب سے فاضل
چیف جسٹس منظور احمد ملک ، سینئر ترین جج مسٹر جسٹس سردار طارق مسعود، مسٹر جسٹس اعجاز الاحسن، مسٹر جسٹس سید منصور علی شاہ، رجسٹرار طارق افتخار احمد، ڈسٹرکٹ اینڈ سیشن جج بہادر علی خان اور سینئر سول جج کو شیلڈز بھی پیش کی گئیں۔
