جمعیت علما پاکستان کی سیالکوٹ میں بھارتی فائرنگ کی مذمت ، جارحیت کابھر پور جواب دینے کا مطالبہ

مکار دشمن کو سفارتی آداب ،بین الاقوامی معاہدوں کا خیال نہیں، بھارت ضرب عضب ،کراچی میں اپنے حامیوں کے خلاف ہونے والی کارروائیوں سے پریشان ہے، مرکزی صدر جمعیت علما پاکستان پیر اعجاز ہاشمی کا بیان

جمعہ 28 اگست 2015 19:00

لاہور ( اُردو پوائنٹ اخبار تازہ ترین۔ 28 اگست۔2015ء ) جمعیت علما پاکستان کے مرکزی صدر پیر اعجاز احمد ہاشمی نے بھارت کی طرف سے سیالکوٹ ورکنگ باونڈری پر بلااشتعال فائرنگ میں شہریوں کی شہادت پرافسوس کا اظہار کرتے ہوئے حکومت سے بھر پور جواب دینے اور جارحیت پر احتجاجاًہندوستانی ہائی کمشنر کو ملک بدر کرنے کا مطالبہ کیا ہے۔جمعہ کو میڈیا سیل کی طرف سے جاری بیان میں پیر اعجاز ہاشمی نے کہا کہ پاکستان کو بھارتی جارحیت کا مسلسل سامنا ہے۔

دشمن اتنا مکار اور سفارتی اخلاقیات سے عاری ہے کہ بین الاقوامی معاہدوں کا اسے زرا بھی خیال نہیں۔ اس لئے ضروری ہوگیا ہے کہ اس کی جارحیت کا منہ توڑ جواب دیا جائے۔ انہوں نے کہا کہ دراصل ہندوستان دہشت گردوں کے خلاف فوج کے آپریشن ضرب عضب اور کراچی میں اپنے حامیوں کے خلاف ہونے والی کارروائیوں سے پریشان ہے۔

(جاری ہے)

اس لئے بھارت کی ہٹ دھرم قیادت ان معاملات سے حکومت اور فوج کی توجہ ہٹانا چاہتی ہے۔

لیکن اسے واضح ہونا چاہیے کہ پاکستان اپنی بقا کے لئے کسی بھی حد تک جاسکتا ہے۔ ہندوستان اور افغانستان مل کر پاکستان کو نقصان پہنچانا چاہتے ہیں مگر انہیں ناکامی کے ساتھ بدنامی کے سوا کچھ حاصل نہیں ہوگا۔ پیر اعجاز ہاشمی نے کہا کہ عالمی برادری کو بھی بھارتی جارحیت کا نوٹس لینا چاہیئے۔اقوام متحدہ اور یورپی ممالک کوبھی بھارتی زیادتیوں کا نوٹس لینا چاہیے۔