ویلفیئر بورڈ خیبر پختونخواہ میں بغیر شناختی کارڈ ، ، ڈومیسائل ، اور تعلیمی قابلیت کے تین ہزارملازمین بھرتی کیے جانے کا انکشاف

جمعہ 28 اگست 2015 17:02

اسلام آباد(اُردو پوائنٹ اخبار تازہ ترین۔ 28 اگست۔2015ء )سینیٹ کی قائمہ کمیٹی سمندر پار پاکستانیوں کے اجلاس میں انکشاف ہوا کہ بغیر شناختی کارڈ ، رہائشی پتہ ، ڈومیسائل ، اور تعلیمی قابلیت کے بغیر بورڈ میں تین ہزار کے قریب ملازمین بھرتی کیے گئے اور گھوسٹ ملازمین کے ریکارڈ کو اس لئے تلف کیا گیا کہ دفتر میں ریکارڈ رکھنے کی جگہ نہیں تھی ۔سیکرٹری ویلفیئر بورڈ خیبر پختونخواہ بھرتیوں کے طریقہ کار اور معیار کے بارے میں تفصیل سے آگاہ نہ کر سکے اور کمیٹی میں پیش کردہ انکوائری رپورٹ کے حوالے سے اراکین کے سوالوں کے جواب پر آگاہ کیا کہ رپورٹ بنانے والے 9 ممبران نے خود تحریر کیا ہے کہ ان کا بھرتی میں کوئی کردار نہ تھا جس پر چیئرمین کمیٹی سینیٹر باز محمد خان نے وزارت کے اعلیٰ حکام سے سوال کیا کہ 2186 ملازمین کے پتے ڈومیسائل کا کوئی اتاپتہ نہیں تمام جعلسازی کا ذمہ دار ایک شخص کو قرار دیا جارہا ہے اور کہا کہ ہو سکتا ہے غیر ملکی شہری اور افغان مہاجرین بھی بھرتی ہو گئے ہوں بے نامی سکولوں میں بہت بڑی تعداد بھرتی کر لی گئی جن میں درجہ چہارم کے غریب ملازمین بھی شامل ہیں لیکن غربت کو مثال بنا کر جعلسازی کے ذمہ داران کو معاف نہیں کیا جاسکتا ۔

(جاری ہے)

جمعہ کو سینیٹ قائمہ کمیٹی سمندر پار پاکستانیوں کا اجلاس چئیرمین کمیٹی باز محمدخان کی صدارات میں ہوا۔۔کمیٹی چیئرمین سینیٹر باز محمد خان نے چیئرمین ویلفیئر بورڈ کی اجلاس میں عدم شرکت پر شدید برہمی کا اظہار کرتے ہوئے کہا کہ کمیٹی کے ون پوائنٹ ایجنڈے کی بریفنگ پر کمیٹی غیر مطمن ہے پارلیمنٹ سے بالا کوئی شخصیت نہیں چیئرمین کو اجلاس میں لازمی شرکت کرنی چاہیے تھی ۔

شرکت سے اگر کوئی تکلیف ہے توچیئرمین شپ چھوڑ دیں اور سختی سے ہدایت دی کہ آئندہ کے اجلاس میں چیئرمین بورڈلازمی شرکت کریں ۔ اجلاس میں انکشاف ہوا کہ بغیر شناختی کارڈ ، رہائشی پتہ ، ڈومیسائل ، اور تعلیمی قابلیت کے بغیر بورڈ میں تین ہزار کے قریب ملازمین بھرتی کیے گئے اور گھوسٹ ملازمین کے ریکارڈ کو کس لئے تلف کیا گیا کہ دفتر میں ریکارڈ رکھنے کی جگہ نہیں تھی ۔