امت زوال کو عروج میں بدلنا چاہتی ہے تو قرآن حکیم سے تعلق مضبوط کرے‘فیض الرحمن درانی

لاہور ( اُردو پوائنٹ اخبار تازہ ترین۔ 31 جولائی۔2015ء)تحریک منہاج القرآن کے مرکزی امیر صاحبزادہ فیض الرحمن درانی نے کہا ہے کہ امت زوال کو عروج میں بدلنا چاہتی ہے تو قرآن حکیم سے اپنے تعلق کو مضبوط کرے، ملت اسلامیہ کے باہمی انتشار نے اغیار اور دہشت گردوں، انتہا پسندوں کے حوصلے بلند کیے اور انہیں خون کی ہولی کھیلنے اور بے گناہوں کی جانیں لینے کا موقع دیا۔

وہ جامع المنہاج ماڈل ٹاؤن میں جمعتہ المبارک کے بڑے اجتماع سے خطاب کررہے تھے۔صاحبزادہ فیض الرحمن درانی نے کہا کہ قرآن پاک نے امن ،محبت ،رواداری ،صبر اور برداشت کی تعلیم دی ،افسوس آج مسلمان ان تعلیمات کو پس پشت ڈال کر مشکلات کا شکار ہو گئے ۔قرآن پاک رہتی دنیا تک کا ضابطہ حیات ہے ،جتنا جلد ممکن ہو سکے امت مسلمہ اپنے اصل اور رشدو ہدایت کے مرکز کی طرف لوٹ آئے ۔

(جاری ہے)

انہوں نے اس موقع پر سربراہ عوامی تحریک ڈاکٹر طاہر القادری کو فروغ امن اور انسداد دہشتگردی کے نصاب کا تحفہ دینے پر خراج تحسین پیش کیا اور کہا کہ یہ عالم اسلام نہیں بلکہ عالم انسانیت کی خدمت ہے۔ انہوں نے کہا کہ 14سو سال گزرنے کے باوجود آج تک قرآن مجید میں ایک آیت ،ایک لفظ اور ایک حرف کی حد تک بھی کمی بیشی نہیں ہو سکی۔ 12سو سال پرانے قرآن حکیم کے نسخے بھی محفوظ ہیں۔

ان میں اور آج کے مطبوعہ نسخوں میں زیر و زبر کا فرق بھی نہیں ہے۔ قرآن مجید کا منفرد انداز اور اسلوب آج تک کسی ادب میں پیدا نہیں ہو سکا۔صاحبزادہ فیض الرحمن درانی نے کہا کہ قرآنی تعلیمات میں جملہ سیاسی ،سماجی ،معاشی اور نفسیاتی مسائل کا حل موجود ہے ۔اﷲ کی برکتیں اور دنیا کا عروج اور اقتدار جب عالم اسلام کے پاس تھا تو اس وقت عالم اسلام نے قرآن کو سینوں کے اندر اور سینوں کے باہر سجارکھا تھا۔ انہوں نے پاکستان کی سلامتی ،خوشحالی کیلئے دعا کی اور کہا کہ اﷲ تعالیٰ پاکستان اور اس کے عوام پر اپنی رحمتیں نازل کرے اور اسے دہشتگردی اور انتہا پسندی کے فتنے سے نجات دے۔