پاک زمبابوے میچ کے دوران دھماکہ خود کش حملہ تھا ، پرویز رشید نے تصدیق کردی

میڈیا نے ذمہ دارانہ رپورٹنگ کرتے ہوئے خبر کو چھپا لیا تاکہ افراتفری نہ پھیلے ، وزیر اطلاعات

ہفتہ 30 مئی 2015 13:15

لاہور(اُردو پوائنٹ اخبار تازہ ترین۔ 30 مئی۔2015ء) پاکستان اور زمبابوے کے درمیان دوسرے ون ڈے میچ کے موقع پر پولیس نے مبینہ خودکش حملے کی کوشش کو ناکام بنا دیا ہے۔لاہور میں فیروز پور روڈ پر ہونے والے دھماکے میں سب انسپکٹر سمیت دوافراد ہلاک جبکہ پچیس زخمی ہوئے۔یہ دھماکہ جمعہ کی شب 9 بجے کے قریب ہوا تھا تاہم اس وقت یہ اطلاعات سامنے آئیں کہ یہ ٹرانسفارمر پھٹنے کے نتیجے میں ہوا لیکن اب وفاقی وزیر اطلاعات پرویز رشید نے میڈیا کو خودکش حملے کی تصدیق کرتے ہوئے کہا کہ پی بی اے نے ذمہ دارانہ رپورٹنگ کرتے ہوئے خبر کو چھپالیا تھا تاکہ افراتفری نہ پھیلے۔

میڈیا رپورٹس کے مطابق دھماکہ کلمہ چوک کے قریب رکشے میں ہوا جس کے باعث علاقے میں خوف وہراس پھیل گیا دھماکے کی زد میں آکرتین پولیس اہلکاروں سمیت پچیس افراد زخمی ہوگئے۔

(جاری ہے)

زخمیوں کو طبی امداد کے لیے مختلف اسپتالوں میں منتقل کیا گیا جہاں زخموں کی تاب نہ لاتے ہوئے سب انسپکٹرعبدالمجید اورایک شہری ہلاک ہوگیا۔واقعے کے بعد رینجرز کی اضافی نفری جائے وقوعہ پر پہنچی اورعلا قے کو گھیرے میں لے لیا۔واقعے کے بعد پریس کانفرنس میں ڈی آئی جی آپریشنزڈاکٹر حیدر اشرف نے بتایا کہ فرانزک ماہرین نیجائے وقوعہ سے شواہد اکٹھے کر لیے ہیں اور جلد حقائق بھی سامنے آجائیں گے۔ ‘