وہ دن دور نہیں ، جب پی ٹی آئی کو میانوالی کے عوام بھی مسترد کر دیں گے ۔ گالیوں سے الیکشن نہیں جیتاجاتا ۔ کنور نوید جمیل

کراچی ( اُردو پوائنٹ اخبار تازہ ترین۔ 18اپریل۔2015ء) ضمنی انتخاب میں حلقہ این اے 246 سے متحدہ قومی موومنٹ ( ایم کیو ایم ) کے نامزد امیدوار کنور نوید جمیل نے کہا ہے کہ وہ دن دور نہیں ، جب پی ٹی آئی کو میانوالی کے عوام بھی مسترد کر دیں گے ۔ گالیوں سے الیکشن نہیں جیتاجاتا ۔ جماعت اسلامی منصورہ سے الیکشن ہارجاتی ہے ۔ پی ٹی آئی بھی جلد ہی اپنے گڑھ سے مسترد کر دی جائے گی ۔

ان خیالات کا اظہار انہوں نے ہفتہ کو سیکرٹری الیکشن کمیشن بابر یعقوب فتح محمد سے ملاقات کے بعد صحافیوں سے گفتگو کرتے ہوئے کیا ۔ انہوں نے کہا کہ سیکرٹری الیکشن کمیشن سے ملاقات کے دوران انہوں نے اس بات کی یقین دہانی کرائی ہے کہ انتخابات میں فول پروف بنایا جائے گا ۔ ڈی جی رینجرز نے بھی یقین دہانی کرائی ہے کہ انتخابات کے موقع پر کشیدگی کا ماحول نہیں ہو گا اور سکیورٹی فول پروف انتظامات ہوں گے ۔

(جاری ہے)

انہوں نے کہا کہ جو لوگ ضمنی انتخاب میں حصہ لے رہے ہیں ، ان سے درخواست کروں گا کہ کراچی کے تشخص کو برقرار رکھیں اور ایسا رویہ اختیار نہ کریں ، جس سے ظاہر ہوتا ہو کہ وہ کراچی کا حصہ نہیں ۔ ضمنی الیکشن میں حصہ لینے والے کبھی الیکشن کے عملے پر اعتراضات کرتے ہیں ۔ کبھی پولیس پر اعتراضات کرتے ہیں ۔ کبھی پولنگ اسٹیشنوں کو جعلی قرار دیتے ہیں ۔

کبھی سکیورٹی پر عدم اطمینان کا اظہار کرتے ہیں ۔ اور ان کا اب یہ مطالبہ رہ گیا ہے کہ پولنگ اسٹیشنز کراچی سے باہر بنائے جائیں ۔ یہ لوگ پرنٹنگ پریس پر بھی عدم اطمینان کا اظہار کر چکے ہیں ۔ سکیورٹی اداروں سمیت ہر ادارے پر عدم اطمینان کا اظہار کرنا ہارنے سے قبل واویلا ہے ۔ یہ لوگ 28 سال سے ہار رہے ہیں ۔ اگر 23 اپریل کو بھی ہار جائیں تو کوئی نئی بات نہیں ہو گی ۔ انہیں اداروں کو بدنام نہیں کرنا چاہئے ۔