راولپنڈی چیمبر آف کامرس اینڈ انڈسٹری کے زیر اہتمام راولپنڈی کی تاریخ کے سب سے بڑے شاپنگ فیسٹول کی تیاریاں اپنے عروج پر پہنچ گئیں

راولپنڈی(اُردو پوائنٹ اخبار تازہ ترین۔10 اپریل۔2015ء)راولپنڈی چیمبر آف کامرس اینڈ انڈسٹری کے زیر اہتمام راولپنڈی کی تاریخ کے سب سے بڑے شاپنگ فیسٹول کی تیاریاں اپنے عروج پر پہنچ گئیں ،دبئی شاپنگ فیسٹول کی طرز پر راول شاپنگ فیسٹول 2 سے 10مئی تک راولپنڈی کی تمام بڑی مارکیٹس جن میں صدر، کمرشل مارکیٹ،مری روڈ ، چائنہ مارکیٹ ،موتی بازار ، راجہ بازار، فیض آباد ،شمس آباد اور چکلالہ سکیم IIIشامل ہیں میں بھرپور سیل لگائی جائے گی ،شہر کی تمام تاجر تنظیموں نے چیمبر کو اپنی حمایت کا یقین دلادیا، انتظامیہ بھی فیسٹول کو کامیاب بنانے میں راولپنڈی چیمبر کے شانہ بشانہ کھڑی ہے ، شہر کو دلہن کی طرح سجایا جائے گا ،بینک روڈ کو واک فری زون بنایا جائے گا اور ملٹی نیشنل کمپنیوں نے فیسٹول کو چار چاند لگانے کیلئے چیمبر سے رابطے تیز کر دیئے ،راولپنڈی چیمبر کے صدر سید اسد مشہدی کا کہنا ہے کہ شاپنگ فیسٹول کے انعقاد کا مقصد میٹرو بس منصوبے سے تباہ ہونیوالے کاروبار کی بحالی ہے تا کہ شہر میں کاروباری سر گرمیوں کو دوبارہ سے فروغ دیا جا سکے۔

(جاری ہے)

مذکورہ بالہ تمام علاقوں میں واقع تمام دکانوں پر خصوصی رعایت دی جائے گی اور اس ضمن میں تمام بڑے برانڈز کو بھی شامل کیا جا رہا ہے ،ہر دکان پر خصوصی کاؤنٹر بنائے جائیں گے جہاں خریداری کرنے والوں کو کوپن جاری کئے جائیں گے کوپن کے ذریعے مخصوص دنوں میں چھوٹے انعام جبکہ ایونٹ کے اختتام پر بڑے پروگرام میں میگا پرائز کی قرعہ اندازی میڈیا کی موجودگی میں کی جائے گی۔

اسکے علاوہ موسیقی کے پروگرام اور دیگر رنگا رنگ پروگرام ترتیب دئے گئے ہیں تا کہ خریداروں کو تفریح کے مواقع فراہم کئے جا سکیں اور بچوں کے لئے کھیلنے کی مخصوص جگہیں اور پارکنگ کی سہولت کے لئیانتظامیہ کے ساتھ بات چیت آخری مراحل میں ہے تا کہ عوام سکون سے اس شاندار فیسٹول سے لطف اندوز ہو سکیں۔ فیسٹول کی دھوم اور راولپنڈی چیمبر کی شناخت کو دیکھتے ہوئے بڑی کمپنیاں اس فیسٹول میں چیمبر کی شراکت کی خواہشمند ہیں ،راولپنڈی چیمبر نے اشتہاری بورڈز کی بکنگ کا کام تیز کر دیا ہے اور ہر مارکیٹ کی ایسوسی ایشن اور عام دکانداروں سے رابطے تیز کر دیئے ہیں تا کہ راولپنڈی کے اس میگا ایونٹ کو صحیح معنوں میں کامیاب بنایا جاسکے۔