حکومت کاپاک چین اقتصادی راہداری توانائی منصوبوں کیلئے22 ماہ کی انوائسنگ کے برابر ریوالونگ اکاؤنٹس قائم کرنے کا فیصلہ

کوئلے سے چلنے والے پاور پلانٹس کو فیول کی عدم سپلائی پر طے شدہ ٹیرف کے ریٹرن آف ایکویٹی کے 20 فیصد کے برابر کپیسٹی پیمنٹ ادا کی جائیگی

اتوار 22 مارچ 2015 17:39

اسلام آباد(اُردو پوائنٹ اخبار تازہ ترین۔22مارچ۔2015ء) وفاقی حکومت نے چائنا پاکستان اقتصادی راہداری پاور پروجیکٹس کے لیے 22 ماہ کی انوائسنگ کے برابر ریوالونگ اکاؤنٹس قائم کرنے اور کوئلے سے چلنے والے پاور پلانٹس کو فیول کی عدم سپلائی پر طے شدہ ٹیرف کے ریٹرن آف ایکویٹی کے 20 فیصد کے برابر کپیسٹی پیمنٹ ادا کرنے کا فیصلہ کیا ہے۔میڈیا رپورٹس کے مطابق یہ فیصلہ کابینہ کی اقتصادی رابطہ کمیٹی(ای سی سی) نے اپنے حالیہ اجلاس میں کوئلے سے چلنے والے پاور پراجیکٹس کے لیے وزارت پانی و بجلی کی جانب سے بھجوائی جانے والی سمری کی منظوری کے تحت کیا ہے۔

ای سی سی سے منظور ہونے والی وزارت پانی و بجلی کی سمری کے مطابق چائنا پاکستان اکنامک کوریڈور پروجیکٹ کے لیے 22ماہ کی انوائسنگ کے برابر کھولے جانے والے ریوالونگ اکاؤنٹس کے لیے گارنٹی وزارت خزانہ فراہم کرے گی اور اگر بجلی کے خریدار کی جانب سے ادائیگیاں نہیں کی جاتیں تو اس صورت میں وزارت خزانہ کی گارنٹی ہوگی کہ ریوالونگ اکاؤنٹ کے ذریعے ادائیگیاں ہوں گی۔

(جاری ہے)

ذرائع کا کہنا ہے کہ مذکورہ اقدام کا بنیادی مقصد پاور پروجیکٹس میں سرمایہ کاری کرنے والے سرمایہ کاروں کے خدشات کو دور کرنا اور ان کی سرمایہ کاری کو تحفظ فراہم کرنا ہے۔دستاویز کے مطابق پاور جنریشن پالیسی 2015 کے تحت سرمایہ کاروں کو پاور جنریشن پالیسی 2002 کے تحت حاصل کردہ قابل عمل لیٹر آف انٹریسٹ (ایل او آئیز) بھی جاری رکھنے کے آپشن کو اختیار کرنے کی منظوری دے دی گئی ہے تاہم اسٹینڈرائزڈ سیکیورٹی ڈاکیومنٹس میں پاور جنریشن پالیسی 2015 کے تحت کی جانے والی چند ترامیم کا اطلاق ہو گا جس کے تحت اگر ادائیگیوں میں تاخیر ہوتی ہے تو اس صورت میں سود کی ادائیگیوں کے ساتھ کے آئی بی او آر (کائی بور) کی شرح کو ساڑھے 4 فیصد سے کم کر کے 2 فیصد کردیا گیا ہے۔

جس کے تحت اگر ادائیگیوں میں تاخیر ہوگی تو اس صورت میں سود کے ساتھ کائی بور کی شرح 2 فیصد ہوگی جو ادا کی جائے گی اس کے علاوہ چائنا پاکستان اکنامک کوریڈور پاور پروجیکٹس کے تحت کوئلے سے چلنے والے پاور پلانٹس کو اگر فیول کی سپلائی نہیں ہوپاتی تو اس صورت میں بجلی کے خریدار کی طرف سے پاور کمپنی کو طے شدہ ٹیرف کے ریٹرن آف ایکویٹی کے 20 فیصد کے برابر کپیسٹی پیمنٹ کی جائے گی۔

دستاویز میں بتایا گیاکہ درآمدی کوئلے کیلیے فیول کی حد 90دن مقرر کی گئی ہے جبکہ مقامی کوئلے کیلیے 150 دن مقرر کی گئی ہے جس کے مطابق اگر درآمدی کوئلے کی 90 دن تک مسلسل پاور پلانٹ کو سپلائی نہیں ہو پاتی تو اس صورت میں 20 فیصد کپیسٹی چارجز ادا کرنا ہوں گے جبکہ مقامی کوئلے کی اگر 150 دن تک مسلسل سپلائی فراہم نہیں کی جاتی تو اس صورت میں 20 فیصد کپیسٹی پیمنٹ کرنا ہوگی۔#/s#

متعلقہ عنوان :