ترک وزیراعظم کا دورہ پاکستان ، ترکی کا ’ضرب عضب‘ متاثرین کیلئے امداد کا اعلان ، مسئلہ کشمیر کا پرامن حل چاہتے ہیں: وزیراعظم نوازشریف

منگل 17 فروری 2015 16:34

ترک وزیراعظم کا دورہ پاکستان ، ترکی کا ’ضرب عضب‘ متاثرین کیلئے امداد ..

اسلام آباد(اُردو پوائنٹ اخبار تازہ ترین۔17فروری 2015ء) پاکستان کے دورے پر موجود ترکی کے وزیراعظم احمد داﺅد اوگلو نے دہشتگردوں کے خلاف شمالی وزیرستان میں جاری آپریشن ‘ضرب عضب‘ کے متاثرین کی بحالی کے لیے دوارب ڈالر امداد کا اعلان کردیا اورکہاکہ مارچ میں افغانستان ، پاکستان اور ترکی کے وزرائے خارجہ کی ملاقات ہوگی ۔ وزیراعظم نواز شریف نے ترک مہمان کو خوش آمدیدکہتے ہوئے کہاکہ پاکستان اور ترکی خطے کے دواہم ممالک ہیں ، سانحہ پشاور پر غیرمتزلزل حمایت پر شکرگزار ہیں ، آزادی اظہار رائے کے نام پر کسی بھی مذہب کی توہین کی مذمت کرتے ہیں ، کشمیر کے مسئلے کا پرامن حل چاہتے ہیں ۔

ترک ہم منصب کے ساتھ ملاقات کے بعد مشترکہ پریس کانفرنس سے خطاب کرتے ہوئے وزیراعظم نواز شریف نے کہاکہ ترکی اور پاکستان نے ہرمشکل وقت میں ایک دوسرے کا ساتھ دیا، ملاقاتوں میں پاک ترک تعلقات کو مزید بہتربنانے کااعادہ کیاہے ، خطے کی ترقی اور عالمی امن میں ترکی کا اہم کردار،سیکیورٹی اوردفاع کے میدان میں تعاون جاری رہے گا۔

(جاری ہے)

ترک وزیراعظم احمد داﺅد اوگلو نے کہاکہ پاکستان اُن کا دوسرا گھر ہے جہاں وہ دوسری دفعہ آئے ہیں لیکن بحیثیت وزیراعظم یہ اُن کاپہلا دورہ ہے ، ترکی میں کوئی بھی وزیراعظم کاعہدہ سنبھالے تو پاکستان کا دورہ کرتاہے ۔

اُن کاکہناتھاکہ دہشتگردی کے خلاف جنگ ، تجارت اورتوانائی بحران پر اہم فیصلے کیے ، پاکستان کے ساتھ 51معاہدوں پر دستخط ہوچکے ہیں ، باہمی تجارت بڑھاکر تین ارب ڈالر تک پہنچائی جائے گی ، پی آئی اے اور ترک ایئرویز کی پروازوں کی تعداد بڑھائیں گے ۔ اُنہوں نے کہاکہ نئی افغان حکومت اور پاکستان کے تعلقات پرخوشی ہوئی ، مارچ میں پاکستان ، ترکی اور افغانستان کے وزرائے خارجہ کی ملاقات ہوگی۔