حکومت کاشتکاروں کے مسائل حل کرنے میں سنجیدہ نہیں‘پاکستان کسان اتحاد،

لاہور(اُردو پوائنٹ تازہ ترین اخبار۔ 23 دسمبر 2014ء ) پاکستان کسان اتحاد نے کاشتکاروں کے مسائل کے حل کے لئے تشکیل کردہ کمیٹی کے کسان دشمن اقدامات کو مسترد کرتے ہوئے کمیٹی میں اہل اور متعلقہ افراد کوشامل کرنے کا مطالبہ کیا ہے۔ جن میں زراعت کی سوج بوجھ بھی ہو۔ یہ مطالبہ پاکستان کسان اتحاد کے چیرمین چودھری محمد انور کی زیر صدارت ہونے والے اجلاس میں کیا گیا ۔

جس میں مرکزی صدر راو طارق اشفاق اور صوبائی صدر رانا غلام قادر بھی شریک تھے۔ اجلاس میں تشویش کا اظہار کیا گیا کہ وزیر زراعت ، سیکرٹری پانی و بجلی اور دیگر ارکان بھی موجود ہیں مگرافسوس کہ کسانوں کے حق میں ابھی تک کوئی اقدام نہیں کیاگیا۔ جو حکومت کی غیر سنجیدگی کا منہ بولتا ثبوت ہے۔اجلاس میں محسوس کیا گیا کہ حکومت کسانوں کے مسائل حل کرنے کی بجائے انہیں بڑھانا چاہتی ہے۔

(جاری ہے)

اجلاس میں کمیٹی کی سفارشات کو مسترد کرتے ہوئے واضح کیا گیا کہ پاکستان کسان اتحاد کو ان افراد کی شمولیت پرتحفظات ہیں، جن کا کاشتکاروں کے مسائل کا کچھ ادراک ہے اور نہ ہی وہ مخلص۔کیڑے مار ادویات اور بیج بیچنے والے کسانوں کے مسائل کو نہیں سمجھ سکتے ۔ کمیٹی میں ایسے افراد کو شامل کیا جائے جنہیں کسانوں کے مسائل کا علم ہو۔ اجلاس میں اس بات پر بھی تشویش کا اظہا ر کیا گیا کہ پٹرولیم مصنوعات کی قیمتوں میں کمی کی جاچکی ہے ۔ مگر زرعی ٹیوب ویلز کے بجلی کے بلوں میں ابھی تک 10.35روپے فی یونٹ وصول کئے جارہے ہیں۔