لشکر جھنگوی کے 2عسکریت پسندوں کے بلیک وارنٹ جاری

ہفتہ 20 دسمبر 2014 13:25

لشکر جھنگوی کے 2عسکریت پسندوں کے بلیک وارنٹ جاری

کراچی(اُردو پوائنٹ اخبار تازہ ترین۔19دسمبر 2014ء) کالعدم لشکر جھنگوی کے 2 دہشت گردوں کو منگل کے روز پھانسی دینے کے لیے بلیک وارنٹ جاری کر دئیے گئے ہیں۔۔ دونوں مجرموں کو فرقہ وارانہ طور پر قتل کے الزام میں 10 سال قبل پھانسی کی سزاء دی گئی تھی۔ انسداد دہشت گردی کی عدالت نے عطاء اللہ عرف قاسم اور محمد اعظم عرف شریف کے بلیک وارنٹ جاری کر دیئے ہیں۔

ان دونوں نے 2001 میں کراچی کے سولجر بازار میں ڈاکٹر رضا پیرانی کو قتل کیا تھا جس پر ان کو 2004 میں انسداد دہشت گردی کی عدالت نے پھانسی کی سزا سنائی تھی۔

(جاری ہے)

عدالت کی جانب سے سکھر جیل کو جاری کیے گئے وارنٹ میں کہا گیا ہے کہ ان مجرموں کو 23 دسمبر (منگل) کی صبح 6:30 پر پھانسی دی جائے سکھر جیل کے سپرینٹنڈنٹ کی جانب سے انسداد دہشت گردی کی عدالت کو مطلع کیا گیا تھا کہ مجرموں کی پھانسی کے لیے بلیک وارنٹ کے اجراء کی ضرورت ہے۔

واضح رہے کہ ان دونوں مجرموں کی پھانسی کے بلیک وارنٹ متعدد بار جاری کیے جا چکے ہیں مگر ایوان صدر سے اس کو ملتوی کر دیا جاتا تھا۔ ان مجرموں کے ہاتھوں قتل ہونے والے ڈاکٹر پیرانی کو سولجر بازار میں اپنے کلینک کے سامنے قتل کیا گیا تھا۔ واضح رہے کہ 2008 کے بعد سے صرف ایک شخص کو پھانسی کی سزاء دی گئی تھی جو کہ فوجی عدالت سے سزاء یافتہ تھا۔

متعلقہ عنوان :