وزیراعلیٰ شہبازشریف سے مختلف اضلاع سے تعلق رکھنے والے اراکین قومی وصوبائی اسمبلی کی ملاقات،

لاہور ( اُردو پوائنٹ تاز ترین اخبار۔ 26نومبر 2014ء ) وزیراعلیٰ پنجاب محمد شہباز شریف سے بدھ کو یہاں مختلف اضلاع سے تعلق رکھنے والے اراکین قومی وصو بائی اسمبلی نے ملاقات کی- منتخب نمائندوں نے اپنے علاقوں میں جاری ترقیاتی سکیموں اور فلاحی پروگراموں پر پیشرفت سے آگاہ کیا-وزیراعلیٰ محمد شہبازشریف نے اس موقع پر گفتگو کرتے ہوئے کہاکہ انتشار اور محاذ آرائی کی سیاست نے ملک کی ساکھ کو متاثر کیا ہے-احتجاج کے ذریعے عوام کی ترقی کے منصوبوں پر اثر انداز ہونے والے اپنے منفی رویوں پر غور کریں-ملک کو ترقی کی شاہراہ سے ہٹانے اور فلاحی پروگراموں میں رخنہ ڈالنے والوں کو قوم کبھی معاف نہیں کرے گی-پاکستان کے 18کروڑ عوام نے احتجاج ، دھرنوں اور منفی سیاست کو یکسر مسترد کردیا ہے-انہوں نے کہاکہ پاکستان مسلم لیگ(ن) کی حکومت ملک کو مسائل کے گرداب سے نکالنے کے لئے پرعزم ہے-عوام نے ہمیں خدمت خلق کا مینڈیٹ دیاہے،عوام کے اعتماد پر پورا اتریں گے- انہوں نے کہاکہ حکومت کی مخلصانہ اور سنجیدہ کاوشوں سے انشاء الله ملک جلد بحرانوں سے نکلے گا-انہوں نے کہاکہ دھرنوں سے معیشت کو ہونے والے نقصان کی محنت سے کام کر کے تلافی کریں گے-ملاقات کرنے والے اراکین اسمبلی میں طاہر بشیر چیمہ، بلال ورک، زاہد اکرم، سجاد حیدر گجر، محمد انیس قریشی، رانا عبدالستار خان اور بلال اکبر بھٹی شامل تھے- اس موقع پر ایم پی اے منشاء الله بٹ ، سابق ایم این اے سعود مجید اور وزیراعلیٰ کے پولیٹیکل سیکرٹری افضال بھٹی بھی موجود تھے-