سرگودھا: ڈی ایچ کیو اسپتال میں ایک اور نومولود دم توڑ گیا، تعداد 14 ہو گئی

ہفتہ 22 نومبر 2014 10:59

سرگودھا: ڈی ایچ کیو اسپتال میں ایک اور نومولود دم توڑ گیا، تعداد 14 ہو ..

سرگودھا(اُردو پوائنٹ اخبار تازہ ترین۔22نومبر 2014ء) سرگودھا کے گورنمنٹ ٹیچنگ اسپتال میں سہولیات کی عدم فراہمی روزانہ بچوں کی جان لے رہی ہے۔ بچوں کی اموات کا سلسلہ جاری ہے اور آج بھی ایک نومولود دم توڑ گیا جس کے بعد چار روز میں 14 بچے لقمہ اجل بن گئے ہیں۔ نومولود بچوں کی اموات پر لواحقین سراپا احتجاج ہیں۔ انہوں نے الزام لگایا ہے کہ اموات ، انکوبیٹرز کی کمی کے باعث ہوئیں۔

اسپتال میں ساٹھ بچے داخل تھے جبکہ انکوبیٹرز کی تعداد صرف پانچ ہے۔

(جاری ہے)

اسپتال انتظامیہ کے مطابق شعبہ نرسری میں اضافی عملہ تعینات کر دیا گیا ہے۔ وزیر اعلیٰ پنجاب نے چوبیس گھنٹے میں مزید 20 انکیوبیٹرز اور دیگر مشینری فراہم کرنے کے لیے سیکرٹری ہیلتھ کو احکامات جاری کر دئیے ہیں۔ سرگودھا میں زچگی کیلئے واحد سرکاری اسپتال گورنمنٹ مولا بخش اسپتال ہے جہاں بچوں کیلئے نرسری وارڈ ہی نہیں بنایا گیا جس کی وجہ سے بچوں کو آدھا کلومیٹر دور ڈسٹرکٹ ٹیچنگ اسپتال میں منتقل کیا جاتا ہے۔ ڈسٹرکٹ ٹیچنگ اسپتال میں نرسری تو موجود ہے لیکن خواتین وارڈ نہیں اس افسوسناک صورتحال کے باعث گزشتہ برس بھی ایک سو اکاون بچے جاں بحق ہو گئے تھے۔