پاکستانی سرزمین پر دہشت گردوں کی واپسی نہیں ہونے دیں گے، دہشت گردوں کے خاتمے تک آپریشن جاری رہے گا

آرمی چیف جنرل راحیل شریف کی امریکی سینٹ کی خارجہ امور کی کمیٹی، آرمز سروسز اور سلیکٹ کمیٹی آن آنٹیلی جنس کے ممبران سے ملاقات میں گفتگو

جمعرات 20 نومبر 2014 12:19

واشنگٹن(اُردو پوائنٹ تاز ترین اخبار۔ 20نومبر 2014ء ) آرمی چیف جنرل راحیل شریف نے کہا ہے کہ پاکستان میں دہشت گردوں کے خاتمے تک فوجی آپریشن جاری رہے گا، قبائلی علاقوں میں دہشت گردوں کو واپس آنے نہیں دیا جائے گا،آخری دہشتگرد کے خاتمے تک آپریشن جاری رکھے گا ۔جمعرات کوآئی ایس پی آر کے مطابق آرمی چیف جنرل راحیل شریف نے امریکی سینٹ کی خارجہ امور کی کمیٹی، آرمز سروسز کمیٹی اور امریکی سلیکٹ کمیٹی آن آنٹیلی جنس سے ملاقات کی ۔

کمیٹی نے دہشت گردوں کے خلاف کامیاب آپریشن پر آرمی چیف کی خدمات کو سراہا اور مبارک باد پیش کی ۔ ملاقاتوں میں سینٹر رابرٹ مینڈیز، چیئرمین رابرٹ کارکر اور دیگر ارکان نے جنرل راحیل شریف کو خوش آمدید کہا۔ کمیٹی نے پاکستان کے کامیاب ملٹری آپریشز کو تسلیم کرتے ہوئے شمالی وزیرستان میں پاک فوج کی جانب سے جاری آپریشنز میں دہشت گردوں کا کمانڈ اینڈ کنٹرول سٹرکچر تباہ کرنے کا اعتراف کیا۔

(جاری ہے)

کمیٹی کے اراکین نے کہا کہ آپریشن کے دوران پاکستان آرمی نے جو اہداف حاصل کئے ہیں وہ قابل تعریف ہیں۔ ارکان نے کہاکہ آپریشن کے نتیجے میں دہشتگردوں کے نیٹ ورک کو کافی حد تک نقصان پہنچا ہے۔ آرمی چیف جنرل راحیل شریف نے کمیٹی کے اراکین سے خطاب کرتے ہوئے کہا کہ آخری دہشتگرد کے خاتمے تک آپریشن جاری رہے گا۔ آرمی چیف نے کہا کہ پاک آرمی پر اعتماد ہے کہ فاٹا آپریشن کے نتیجے میں وہ مطلوبہ اہداف حاصل کریں گے اور دہشتگردوں کو پاکستان کی سرزمین پر پناہ گاہیں نہیں بنانے دی جائیں گی۔

جنرل راحیل شریف نے وزیرستان کے آئی ڈی پیز کی جلد بحالی کے حوالے سے بھی شرکاء کو آگاہ کیا۔ ملاقاتوں میں خطے کی سکیورٹی کی صورتحال پر بات چیت کی گئی ۔ سینیٹرز نے پاکستان اور امریکہ کے درمیان مضبوط اور طویل مدتی شراکت داری قائم رکھنے کی خواہش کا اظہار کیا۔

متعلقہ عنوان :