آئندہ 72 گھنٹوں میں موجودہ بحران کا فیصلہ ہوجائیگا، شیخ رشید احمد

پیر 1 ستمبر 2014 22:04

اسلام آباد(اُردو پوائنٹ اخبار تازہ ترین۔1ستمبر۔2014ء) عوامی مسلم لیگ کے سربراہ شیخ رشید احمد نے کہا ہے کہ ملک میں جاری صورتحال تیزی سے تبدیل ہورہی ہے  آئندہ 72 گھنٹوں میں موجودہ بحران کا فیصلہ ہوجائیگا۔ایک انٹرویومیں شیخ رشید نے کہاکہ ملک کی موجودہ صورت حال تیزی سے تبدیل ہورہی ہے اور حالات حتمی مرحلے میں داخل ہوگئے ہیں اس وقت اسلام آباد میں اعصاب کی جنگ لڑی جارہی ہے، حکومتی وزرا کا کہنا ہے کہ انہوں نے عمران خان کے 6 میں پونے 6 مطالبات مان لئے ہیں، ہوسکتا ہے آئندہ ایک دو روز میں تمام مطالبات ہی مان لئے جائیں آئندہ 72 گھنٹے انتہائی اہم ہیں اور اسی دوران موجودہ بحران کا فیصلہ ہوجائیگا۔

انہوں نے کہاکہ وہ پی ٹی وی پر حملے کی بھرپور مذمت کرتے ہیں۔ سرکاری عمارات میں داخل ہونا غیرقانونی ہے، ان کے خلاف کارروائی ہونی چاہئے۔

(جاری ہے)

شیخ رشید احمد نے کہا کہ جاوید ہاشمی نے انہیں عمران خان کے ساتھ ہونے والے معاملے پر بلاوجہ ملوث کیا انہیں اس سارے مسئلے پر کچھ بھی معلوم نہیں تھا، آج وہ بہت بڑے جمہوریت کے چیمپئن بن رہے ہیں حالانکہ ان سمیت ملک کا کوئی بھی سیاستدان ایسا نہیں جس نے کبھی کسی آمر کی حمایت نہ کی ہو، جنرل ضیاء الحق کی کابینہ میں وزارت کا حلف لینے کیلئے وہ ان کے گھر میں تیار ہوئے تھے۔

اس لئے وہ صرف یہ کہتے ہیں کہ انہیں چاہئے تھا کہ وہ بحیثیت صدر تحریک انصاف اپنی جماعت کو سنبھالتے، وہ سمجھتے ہیں لوگوں کو ان سے محبت ہے اس لئے وزیر اعظم سے لے کر خواجہ سعد رفیق اور مخدوم جاوید ہاشمی انہیں ہی نشانہ بنارہے ہیں۔

Facebook Twitter Google + Share on Whatsapp

آئندہ 72 گھنٹوں میں موجودہ بحران کا فیصلہ ہوجائیگا، شیخ رشید احمد

متعلقہ عنوان :

مزید اہم خبریں