عمران خان اور طاہرالقادری کو کسی صورت دوبارہ دھرنے پر نہیں بیٹھنے دیں گے، وزیردفاع

اتوار 31 اگست 2014 12:59

اسلام آباد اسلام آباد (اُردو پوائنٹ اخبار تازہ ترین۔31اگست۔2014ء) وزیردفاع خواجہ آصف کا کہنا ہے کہ عمران خان اور طاہرالقادری کو دوبارہ دھرنے پر نہیں بیٹھنے دیں گے اب ایک کو کینیڈا اور دوسرے کو بنی گالہ جانا ہوگا. نجی ٹی وی سے خصوصی گفتگو کرتے ہوئے خواجہ آصف نے کہا کہ پارلیمنٹ ہاؤس کے احاطے کو مردوں سے کلیئر کرالیا گیا ہے اب اس میں صرف خواتین اور بچے موجود ہیں جبکہ وزیراعظم نے خواتین اور بچوں کو احاطے میں بیٹھنے کی اجازت دی ہے۔

ان کا کہنا تھا کہ اب عمران خان اور طاہرالقادری کو کسی صورت دوبارہ دھرنے پر نہیں بیٹھنے دیں گے اب ایک کینیڈا اور دوسرا بنی گالہ جائے گا۔ اانہوں نے کہا کہ حکومت نے پہلے دن سے بھرپور صبر کا مظاہرہ کیا، فریقین نے ریڈزون میں گھس کر وعدہ خلافی کی اور تحریری معاہدے کی بھی خلاف ورزی کی لیکن حکومت نے پھر بھی رد عمل نہیں دیا جبکہ حکومت نے گزشتہ کئی دنوں میں بھی اس لیے صبر کا مظاہرہ کیا تاکہ کوئی جانی نقصان نہ ہو۔

(جاری ہے)

انہوں نے کہا کہ مذاکرات کو ڈھال بنانے کی کوشش کی گئی ہے ان لوگوں نے وزیراعظم ہاؤس اور پارلیمنٹ ہاؤس سمیت اہم عمارتوں پر قبضے کی کوشش کی لیکن حکومت ان عمارتوں کی بھرپور حفاظت کرے گی۔وزیر دفاع کا کہنا تھا کہ ڈنڈوں کے ساتھ پر امن نہیں رہا جاسکتا، ہزاروں لوگ مسلح تھے اور ان کے پاس آتشی اسلحہ بھی موجود تھا، حکومت ان لوگوں کو کھلی چھوٹ نہیں دے سکتی کیونکہ حکومت کی بھی آخری دفاعی لائن موجود ہے، ہم آئین و قانون کی حدود میں رہ کر سرکاری اور دیگر اثاثوں کا دفاع کریں گے۔

انہوں نے کہا کہ گزشتہ کئی دنوں سے لوگوں کو غیرآئینی و غیر قانونی اور ریاست مخالف اقدام اٹھانے پر مجبور کیا جارہا ہے،اپنی تقاریر میں وزیراعظم اور وزیراعلیٰ پنجاب کے نام لے کر پھانسیاں لگانے کی باتیں کی جارہی ہیں، ان لوگوں نے کوئی پیار کی بات نہیں کی بلکہ ایسی باتیں کیں جو کوئی پاکستانی نہیں کرسکتا۔