پاک فوج نے میران شاہ، بویا اور دیگان کو دہشتگردوں سے کلیئرکرالیا، آئی ایس پی آر

اتوار 27 جولائی 2014 21:42

راولپنڈی(اُردو پوائنٹ اخبار تازہ ترین۔27جولائی۔2014ء) شمالی وزیرستان میں پاک فوج کا دہشت گردوں کے خلاف آپریشن ”ضرب عضب“ کامیابی سے جاری ہے، فورسز نے میران شاہ، بویا اور دیگان کو دہشتگردوں سے کلیئر کرالیا۔پاک فوج کے شعبہ تعلقات عامہ آئی ایس پی آر کے مطابق آپریشن ضرب عضب کی اہداف کے مطابق پیش رفت جاری ہے اب تک پاک نے میران شاہ، بویا اور دیگان کو مکمل جب کہ میرعلی اور مضافات کے 70 فیصدعلاقے کو دہشت گردوں سے کلیئر کرالیا جس کے بعد میرعلی اور نواحی علاقوں میں گھر گھرسرچ آپریشن کا سلسلہ جاری ہے۔

(جاری ہے)

پاک فوج کے مطابق میرعلی دہشت گروں کا دوسرا بڑا ٹھکانا تھا جسے کلیئر کرایا گیا ہے جب کہ وہاں سے اسلحہ اور بارود بنانے والی 2 بڑی فیکٹریاں بھی پکڑی گئیں، اس کے علاوہ آپریشن کے دوران بویا سے 5 ہزار کلو گرام وزنی بارودی سرنگیں برآمد ہوئی جسے ناکارہ بنا دیا گیا جب کہ 2 زیر زمین سرنگوں سے بھی دھماکا خیز مواد کے 30 بیرلز ملے ہیں۔واضح رہے کہ پاک فوج کی جانب سے گزشتہ ماہ 14 جون سے شمالی وزیرستان میں دہشت گردوں کے خلاف آپریشن ضرب عضب کے نام سے شروع ہونے والے آپریشن میں اب تک 500 سے زائد ملکی اور غیر ملکی دہشت گرد ہلاک ہوچکے ہیں۔