حکومت آزادی مارچ کو فوج کے ساتھ تصادم میں بدلنا چاہتی ہے، تحریک انصاف

ہفتہ 26 جولائی 2014 18:36

اسلام آباد(اُردو پوائنٹ اخبار تازہ ترین۔26جولائی۔2014ء) تحریک انصاف نے اسلام آباد میں فوج بلانے کے حکومتی فیصلے کو مسترد کرتے ہوئے کہا ہے کہ حکومت آزادی مارچ کو فوج کے ساتھ تصادم میں بدلنا چاہتی ہے۔نجی ٹی وی کےمطابق تحریک انصاف کی کور کمیٹی کا اجلاس چیرمین عمران خان کی زیر صدارت ہوا جس میں پارٹی کی اعلیٰ قیادت نے شرکت کی، اجلاس میں 14 اگست کے لانگ مارچ کی حکمت عملی اور اسلام آباد میں آرٹیکل 245 کے نفاذ کا جائزہ لیا گیا جبکہ تحریک انصاف کی کور کمیٹی نے اسلام آباد میں فوج تعینات کرنے کے حکومتی فیصلے کو مسترد کرتے ہوئے اس کی شدید مذمت کی۔

تحریک انصاف کی کور کمیٹی کا کہنا تھا کہ تحریک انصاف نے ہمیشہ پر امن احتجاج کیا ہے اس لیے اسلام آباد میں فوج کی طلبی کے فیصلے کو سختی سے مسترد کرتے ہیں، حکومت کا وفاقی دارالحکومت میں فوج بلانے کا فیصلہ کسی صورت درست نہیں ہے۔

(جاری ہے)

کمیٹی کےشرکا نے کہا کہ فوج کی اسلام آباد میں طلبی کا فیصلہ سیاسی ہے،حکومت آزادی مارچ کو فوج کے ساتھ تصادم میں بدلنا چاہتی ہے، قومی ادارے فوج کو سیاسی مخالفین کے خلاف استعمال نہیں کرنا چاہئے اس طرح فوج کو جمہوری احتجاج میں گھسیٹنا غیر اخلاقی ہے۔

کمیٹی کا کہنا تھا کہ حکومت عوام کے جان ومال کے تحفظ میں ناکام ہوگئی ہے اور اسلام آباد میں آرٹیکل 245 کا نفاذ حکومت کی ناکامی کا منہ بولتا ثبوت ہے جس کے خلاف سپریم کورٹ سے رجوع کرنے کا حق رکھتے ہیں۔