عوام نے نوازشریف کو وزیراعظم منتخب کیا ہے وہ بادشاہ نہ بنیں، آصف زرداری

منگل 15 جولائی 2014 15:52

لاہور(اُردو پوائنٹ تازہ ترین اخبار۔15جولائی 2014ء) پاکستان پیپلز پارٹی کے شریک چیئرمین اور سابق صدر آصف علی زرداری کا کہنا ہے کہ عوام نے نوازشریف کو وزیراعظم منتخب کیا تھا لیکن وہ بادشاہ بن گئے ہیں۔ لاہور سے جاری بیان میں سابق صدر کا کہنا تھا کہ پاکستان پیپلز پارٹی نے ملک میں جمہوریت کی خاطر نتائج قبول کئے تھے، وزیراعظم نواز شریف ووٹوں کی دوبارہ گنتی اور 4 حلقوں میں ووٹوں کی تصدیق سے نجانے کیوں خوفزدہ ہیں۔

4 حلقے ہوں یا 40، ہر صورت ان حلقوں میں ووٹوں کی گنتی اور ان کی تصدیق ہونی چاہیئے۔ انہوں نے کہا کہ گزشتہ انتخابات میں عوام نے نواز شرہف کو وزیر اعظم منتخب کیا تھا بادشاہت کے لئے نہیں، وہ بادشاہ بن کر دوسرے صوبوں کے معاملات میں بے جا مداخلت کرہے ہیں جو کسی بھی طرح قابل قبول نہیں۔

(جاری ہے)

آصف علی زرداری کا کہنا تھا کہ وزیر اعظم نواز شریف نے گزشتہ انتخابات سے قبل عوام سے کئی وعدے کئے تھے لیکن ایک سال کے دوران وہ ان وعدوں کو پورا کرنے میں مکمل طور پر ناکام ہوگئے ہیں۔

مہنگائی ، بے روزگاری اور غربت اپنے عروج پر ہے۔ اس کے علاوہ بجلی کا بحران پیپلز پارٹی کے گزشتہ دور سے بھی زیادہ ہوگیا ہے۔ گزشتہ برس تمام سرکلر ڈیٹ ادا کرنے کے بعد ایک مرتبہ پھر یہ 280 ارب روپے سے تجاوز کرگیا ہے۔ ان تمام صورت حال کو دیکھتے ہوئے کہا جاسکتا ہے کہ حکومت ناکامی کی جانب بڑھ رہی ہے۔