غیرقانونی اسلحہ رکھنے پر امریکی شہری جسمانی ریمانڈ پر کراچی پولیس کے حوالے

منگل 6 مئی 2014 14:19

کراچی(اُردو پوائنٹ تازہ ترین اخبار۔ 6مئی 2014ء) پستول کی گولیاں اور میگزین برآمد ہونے پر ائیرپورٹ سے حراست میں لئے گئے امریکی شہری کو 4 روزہ جسمانی ریمانڈ پر پولیس کے حوالے کردیا گیا۔

(جاری ہے)

گزشتہ روز کراچی ایئرپورٹ سے گرفتار کئے گئے امریکی شہری جوئیل یوگیون کو پولیس نے ملیر ڈسٹرکٹ کورٹ میں جوڈیشل مجسٹریٹ آدم سنگھار کے روبرو پیش کیا جہاں ملزم سے اب تک کی جانے والی تفتیش سے متعلق عدالت کو آگاہ کیا گیا جس کے مطابق ملزم نائن ایم ایم پستول کی گولیاں اور میگزین کراچی سے اسلام آباد لے جانے کی کوشش کررہا تھا۔

پولیس نے مزید تفتیشں کے لئے عدالت سے امریکی شہری کا 4 روزہ جسمانی ریمانڈ طلب کیا جسے عدالت نے منظور کرتے ہوئے ملزم کو پولیس کے حوالے کردیا اور 10 مئی تک تفتیشی رپورٹ عدالت میں پیش کرنے کی ہدایت کی۔

واضح رہے کہ گزشتہ روز ایئرپورٹ سیکیورٹی فورس نے امریکی قونصل خانے میں تعینات امریکی شہری کو غیرقانونی طور پر پستول کی گولیاں اور میگزین رکھنے کے الزام میں گرفتار کرکے ایئرپورٹ تھانے کی پولیس کے حوالے کردیا تھا۔