4G,3G اسپیکٹرم کی نیلامی؛ 6 مراحل بعد بھی بولی 90 کروڑ20 لاکھ ڈالرزسے نہ بڑھ سکی

بدھ 23 اپریل 2014 15:40

4G,3G اسپیکٹرم کی نیلامی؛ 6 مراحل بعد بھی بولی 90 کروڑ20 لاکھ ڈالرزسے نہ ..

اسلام آباد(اُردو پوائنٹ تازہ ترین اخبار۔ 23اپریل 2014ء) پاکستان ٹیلی کمیونی کیشن اتھارٹی کی جانب سے 3G اور 4G اسپیکٹرم کی نیلامی جاری ہے تاہم 6 مراحل مکمل ہونے کے بعد بھی اب تک ان لائسنسوں کی مجموعی بولی 90 کروڑ 20 لاکھ 28 ڈالرز سے آگے نہ بڑھ سکی۔ اسلام آباد کے مقامی ہوٹل میں تھری جی کے 3 جبکہ فور جی کے 2 لائسنس کی نیلامی کا عمل جاری ہے جس میں ملک کی 4سیلولر کمپنیاں حصہ لے رہی ہیں، تھری جی اسپیکٹرم کے ایک لائسنس کی بنیادی قیمت 29 کروڑ 50 لاکھ ڈالر جبکہ فور جی اسپیکٹرم کے ایک لائسنس کی بنیادی قیمت 21 کروڑ ڈالرز رکھی گئی ہے،یہ لائسنس 15 سال کی مدت کے لیے جاری کیے جائیں گے،فور جی لائسنس کی بولی میں حصہ لینے کے لئے تھری جی لائسنس لینا ضروری ہے، کامیاب بولی دہندہ کو 50 فیصد ادائیگی 30 دن اور بقایا ادائیگی 5 سال میں مساوی قسطوں میں کرنا ہوگی۔

(جاری ہے)

پی ٹی اے کو امید ہے کہ ان لائنسنسز کی فروخت سے ایک ارب 30 کروڑ ڈالر تک رقم حاصل ہوگی۔

نیلامی کے آغاز سے قبل تمام پارٹیوں نے کم سے کم بنیادی رقم پر اپنی پیش کشیں جمع کرائی جس کے بعد بولی میں حصہ لینے والی کمپنیوں کو مختلف نشانات الاٹ کئے گئے، پیش کش جمع ہونے کے بعد الیکٹرانک سسٹم کے ذریعے جیتنے والے کا اعلان کیا جائے گا، چیئرمین پی ٹی اے ڈاکٹر اسماعیل کا کہنا ہے کہ تھری جی اور فور جی کی نیلامی میں پارٹیز کی جانب سے بنیادی قیمت سے کہیں زیادہ پیشکش ملی ہیں، نیلامی کے اب تک 3 مراحل مکمل ہوچکے ہیں، مجموعی طور پر بولی 90 کروڑ 30 لاکھ ڈالرز پر پہنچ گئی ہے۔