وزیراعظم نواز شریف اور سابق صدر آصف زرداری کی ملاقات کل اسلام آباد میں ہوگی

منگل 15 اپریل 2014 19:38

اسلام آباد(اُردو پوائنٹ اخبار تازہ ترین۔15اپریل۔2014ء) وزیراعظم نواز شریف اور سابق صدر آصف علی زرداری کے درمیان کل وزیراعظم ہاؤس میں ملاقات ہوگی۔نجی ٹی وی کے مطابق وزیراعظم نوازشریف اور سابق صدر آصف زرداری کے درمیان ملاقات کل دوپہر وزیر اعظم ہاؤس میں ہوگی جس میں سیاسی امور سمیت ملک کی مجموعی صورتحال، سندھ حکومت کے مسائل اور کراچی میں امن و امان کی صورتحال سمیت اہم امور پر تبادلہ خیال کیا جائےگا اور ان پر اہم فیصلے بھی متوقع ہیں۔

(جاری ہے)

واضح رہے کہ نواز شریف کی وزارت عظمیٰ کا منصب سنبھالنے کے بعد سابق صدر آصف زرداری کے ساتھ ان کی پہلی باضابطہ ملاقات ہوگی اور ملک کی موجودہ صورتحال میں یہ ملاقات نہایت اہمیت کی حامل تصور کی جارہی ہے کیوں حکومت کو اس وقت طالبان سے مذاکرات اورسابق صدر جنرل(ر)پرویزمشرف کے خلاف غداری کیس سمیت تحفظ پاکستان بل پر سینیٹ میں اکثریت نہ ہونے پر مشکلات کا سامنا ہے جب کہ سینیٹ میں اس وقت پیپلزپارٹی سیمت دیگر اپوزیشن جماعتوں کو اکثریت حاصل ہے۔