وزیرداخلہ کا آئی جی اسلام آباد اورایس ایس پی آپریشن کو تبدیل کرنے کا حکم

بدھ 26 مارچ 2014 21:40

اسلام آباد(اُردو پوائنٹ اخبار تازہ ترین۔26مارچ۔2014ء) وزیرداخلہ چوہدری نثارعلی خان نے ضلع کچہری سانحے کے بعد بالآخر آئی جی اسلا م آباد اور ایس ایس پی آپریشن کو تبدیل کرنے کا حکم دے دیا۔نجی ٹی وی کے مطابق وفاقی وزیر داخلہ چوہدری نثار نے آئی جی اسلام آباد سکندر حیات سمیت ایس ایس پی آپریشنز ڈاکٹر رضوان اور ڈائریکٹر جنرل نیشنل کرائسز مینجمنٹ سیل کو بھی تبدیل کرنے کے احکامات جاری کردیئے ہیں۔

(جاری ہے)

سکندر حیات کی تبدیلی کے بعد ڈی آئی جی خالد خٹک کو آئی جی اسلام آباد کا اضافی چارج دیا جائے گا جبکہ ایس ایس پی آپریشنز کی ذمے داریاں سلطان اعظم تیموری سنبھالیں گے۔ڈائریکٹر جنرل نیشنل کرائسز مینجمنٹ سیل کی خدمات اسٹیبلشمنٹ ڈویژن کے سپرد کردی گئی ہیں اور عہدے کا اضافی چارج نیشنل کوآرڈی نیٹر نیکٹا کو دے دیا گیا ہے جبکہ عہدوں پر باقاعدہ تقرریاں آئندہ ہفتے کردی جائیں گی۔دوسری جانب پنجا ب حکومت نے بھی بیورو کریسی میں بڑے پیمانے پر تبدیلی کرتے ہوئے 30 افسران کے تقرر و تبادلے کردیئے ہیں۔