حکومتی صفوں میں بعض عناصر مذاکرات کا ماحول خراب کررہے ہیں، شاہد اللہ شاہد

بدھ 12 مارچ 2014 15:11

باجوڑ(اُردو پوائنٹ تازہ ترین اخبار۔ 12مارچ 2014ء) کالعدم تحریک طالبان پاکستان کے ترجمان شاہد اللہ شاہد کا کہنا ہے کہ حکومت کی صفوں میں بعض عناصر مذاکرات کے ماحول کو خراب کرنے کی کوشش کررہے ہیں۔اپنے ایک بیان میں کالعدم تحریک طالبان پاکستان کے ترجمان شاہد اللہ شاہد نے کہا ہے کہ طالبان سنجیدگی سے جنگ بندی پر عمل پیرا ہیں اور کسی گروپ کو جنگ بندی کی خلاف ورزی کی اجازت نہیں دی جائے گی۔

(جاری ہے)

انہوں نے کہا کہ حکومتی صفوں میں بعض ایسے عناصر موجود ہیں جو مذاکرات کے ماحول کو خراب کررہے ہیں۔ طالبان کی جانب سے جنگ بندی کے اعلان کے باوجود باجوڑ اور مہمند ایجنسی میں گولہ باری اور سرچ آپریشن کا سلسلہ جاری ہے جب کہ چارسدہ سے بھی آپریشن کے دوران بے گناہ لوگوں کو گرفتار کیا گیا اور سینٹرل جیل کراچی سے طالبان کے کارکنوں کو دوسرے صوبوں میں منتقل کیا جارہا ہے۔