چیف کمشنر اسلام آباد نے کچہری حملے کی جوڈیشل انکوائری کا حکم دے دیا

منگل 4 مارچ 2014 12:29

اسلام آباد(اُردو پوائنٹ تازہ ترین اخبار۔ 4مارچ 2014ء) ضلع کچہری پر حملے کی تحقیقات کے لئے ہائی کورٹ کی انکوائری کمیٹی کا اجلاس کل ایف ایٹ میں ہوگا جب کہ چیف کمشنر نے بھی حملے کی جوڈیشل انکوائری کا حکم دے دیا ہے، کمیٹی جمعہ کو اپنی رپورٹ پیش کرے گی۔. مطابق اسلام آباد کی ایف ایٹ کچہری میں دہشت گردوں کے حملے کی انکوائری کے لیے مختلف کمیٹیاں تشکیل دے دی گئی ہیں۔

پولیس کے ساتھ عدالت اور ضلعی انتظامیہ نے بھی اپنی اپنی انکوائری کمیٹیوں سے سانحے کی تحقیقات کروانے کا فیصلہ کیا ہے۔ اسلام آباد ہائی کورٹ کی انکوائری کمیٹی کی سربراہی جسٹس شوکت عزیز صدیقی کر رہے ہیں اور کمیٹی کا اجلاس کل صبح 10 بجے ایف ایٹ کچہری میں طلب کر لیا گیا ہے۔ چیف جسٹس اسلام آباد ہائی کورٹ نے ایف ایٹ کچہری کے دورہ کے موقع پر جاں بحق ہونے والے ایڈیشنل سیشن جج رفاقت اعوان کے اہل خانہ کے لیے مراعات کا اعلان بھی کیا۔

(جاری ہے)

چیف کمشنر اسلام آباد نے بھی ڈپٹی کمشنر مجاہد شیر دل کی سربراہی میں جوڈیشل انکوائری کمیٹی قائم کردی ہے جو 5 سوالوں کے جواب تلاش کرے گی کہ حملہ آوروں کی تعداد کتنی تھی؟، حملہ آور کچہری میں کیسے داخل ہوئے؟، پولیس سیکیورٹی ایس او پی کے مطابق تھی؟، پولیس نے حملہ آوروں کو روکنے کے لیے کیا اقدامات کئے؟، ریسکیو آپریشن بروقت ہوا یا نہیں؟۔ کمیٹی انکوائری مکمل کر کے جمعہ کوچیف کمشنر کو رپورٹ پیش کرے گی۔

Facebook Twitter Google + Share on Whatsapp

چیف کمشنر اسلام آباد نے کچہری حملے کی جوڈیشل انکوائری کا حکم دے دیا

مزید اہم خبریں