بنگلہ دیش نے ٹیسٹ سٹیٹس پر حمایت کر دی،بگ تھری پاور ایک ووٹ کے فاصلے پر

جمعرات 30 جنوری 2014 11:46

دبئی(اُردو پوائنٹ تازہ ترین اخبار۔ 30جنوری 2014ء) آئی سی سی کے بگ تھری فارمولے نے ایک اور ووٹ حاصل کر لیا۔ بنگلہ دیش کرکٹ بورڈ نے ٹیسٹ سٹیٹس کے بدلے میں تین بڑوں کی حمایت کا اعلان کر دیا۔ ویسٹ انڈیز کے بعد بنگلہ دیش کرکٹ بورڈ نے بھی بگ تھری فارمولے کی حمایت کا اعلان کر دیا۔ کرکٹ ویب سائٹ کے مطابق بی سی بی نے اپنا ٹیسٹ اسٹیٹس برقرار رکھے جانے کی یقین دہانی کے بعد تین بڑوں کا ساتھ دینے کا فیصلہ کیا۔

اب پوزیشن پیپر کی مخالفت کرنیوالوں میں صرف پاکستان، جنوبی افریقا اور سری لنکا کے بورڈز رہ گئے ہیں۔ بگ تھری کو اپنی تجاویز کی منظوری کے لیے درکار سات میں سے چھ ووٹ حاصل ہو چکے ہیں۔ ماضی میں یہی بنگلہ دیش بورڈ ٹیسٹ ٹیموں کو دو درجوں میں تقسیم کی تجویز پر سخت مخالفت کرتے ہوئے شدید احتجاج کر چکا ہے۔

(جاری ہے)

گزشتہ روز آئی سی سی کے ایگزیکٹو بورڈ کے اجلاس کے اختتام پر صدر ایلن آئزک اور چیف ایگزیکٹو ڈیو رچرڈسن نے پریس کانفرنس کی جس میں انہوں نے پوزیشن پیپر کی کئی تجاویز پر اتفاق رائے کی خبر سنائی ساتھ ہی چند ایشوز کا فیصلہ آئندہ اجلاس تک موخر کر دیا گیا۔

صدر آئی سی سی کا کہنا تھا کہ ایگزیکٹو بورڈ میٹنگ میں کئی اہم معاملات زیر غور آئے جس میں بگ تھری بھارت، انگلینڈ اور آسٹریلیا کے معاملے پر تفصیلی بات چیت ہوئی جس پر حتمی فیصلہ فروری میں ہونیوالے سنگاپور کے اجلاس میں ہو گا۔