آئی سی سی اجلاس میں پاکستان کے دوٹوک مؤقف کے باعث بگ تھری کے معاملے پر فیصلہ نہ ہوسکا

منگل 28 جنوری 2014 20:49

دبئی(اُردو پوائنٹ اخبار تازہ ترین۔28جنوری۔2014ء) بھارت، آسٹریلیا اورانگلینڈ کی جانب سے انٹرنیشنل کرکٹ کونسل پر اپنی اجارہ داری قائم کرنے کے معاملے پر ہونے والا اجلاس پاکستان کے واضح اوردو ٹوک مؤقف کے بعد گرما گرمی میں بدل گیا جس کے بعد اس معاملے کو ایک ماہ کے لئے ٹال دیا گیا۔دبئی میں آئی سی سی ہیڈکوارٹر میں جاری اجلاس کے دوران بگ تھری کے معاملے پر شرکا کے درمیان گرما گرمی کے بعد رائے شماری نا ہوسکی، پاکستان، جنوبی افریقا، سری لنکا اور بنگلا دیش کی جانب سے بگ تھری کی بھرپور مخالفت کی گئی، اس دوران بھارت، انگلینڈ اور آسٹریلین کرکٹ بورڈز کے سربراہوں نے پاکستان کرکٹ بورڈ کے چیرمین ذکا اشرف کو آڑے ہاتھوں لیا، تینوں ارکان کا کاکہناتھا کہ پاکستان کرکٹ بورڈ لابنگ کر کے دوسرے رکن بورڈز کو اکٹھاکررہا ہے اور نئے مسودے کی منظوری میں رکاوٹیں ڈال رہاہے ، ذکا اشرف نے الزامات مسترد کرتے ہوئے ارکان کو مخاطب کرتے ہوئے کہا کہ وہ اگر کوئی بات کریں اس میں تمیز اورشائستگی کو ملحوظ خاطر رکھیں۔

(جاری ہے)

ذکا اشرف نے بھارتی اور آسٹریلین ہم منصب کو متنبہ کیا کہ اگر انہوں نے آئندہ ایسا رویہ اختیار کیا توانہیں بھی اسی طرح جواب دیا جائے گا جب کہ ویسٹ انڈیز، بنگلا دیش، سری لنکا اور جنوبی افریقا نے بھی پاکستان کے مؤقف کی بھرپور تائید کی۔ اجلاس میں فیصلہ کیا گیا کہ کرکٹ میں کسی ملک کو امتیازی حیثیت حاصل نہیں اور ایسوسی ایٹس ممبرز میں برابری کی بنیاد پر فنڈز تقسیم ہوں گے، اجلاس کے دوران بگ تھری اور دیگر ممالک نے مجوزہ ایگزیکٹیو کمیٹی کے اراکین بڑھانے پر اتفاق کیا جس کے بعد ایگزیکٹیو کمیٹی میں اب 4 کے بجائے 5 اراکین شامل ہوں گے، آئی سی سی نے واضح کیا کہ بھارت، انگلینڈ اور آسٹریلیا کے علاوہ تمام ٹیسٹ ممالک کو یکساں فنڈ دیا جائے گا اور 2015 سے 2030 تک کے فیوچر ٹور پروگرام دو طرفہ معاہدے کے تحت ہوں گے۔