مشرف غداری کیس، پراسیکیوٹر کی اے ایف آئی سی کے سربراہ کو طلب کرنے کی درخواست

منگل 28 جنوری 2014 17:19

اسلام آباد(اُردو پوائنٹ تازہ ترین اخبار۔ 28 جنوری 2014ء) سابق صدر پرویز مشرف کے خلاف غداری کیس میں پراسیکیوٹر اکرم شیخ نے آرمڈ فورسز انسٹیٹیوٹ آف کارڈیالوجی کے سربراہ کو جرح کے لیے خصوصی عدالت میں طلب کرنے کی درخواست دائر کردی۔ذرائع کے مطابق پراسیکیوٹر اکرم شیخ کی طرف سے دائر کی گئی درخواست میں مؤقف اختیار کیا گیا ہے کہ انہیں سابق صدر پرویز مشرف کی میڈیکل رپورٹ پر چند اعتراضات ہیں لہذا وہ اے ایف آئی سی کے سربراہ پر جرح کرنا چاہتے ہیں۔

(جاری ہے)

اس لیے انہیں عدالت میں طلب کیا جائے، سابق صدر کے خلاف غداری کیس کی سماعت کل سے جسٹس فیصل عرب کی سربراہی میں 3 رکنی بینچ دوبارہ شروع کرے گا۔ واضح رہے کہ گزشتہ روز پراسیکیوٹر اکرم شیخ نے پرویز مشرف کی صحت سے متعلق اے ایف آئی سی کی رپورٹ کے خلاف اعتراضات کا مسودہ عدالت میں جمع کرایا تھا جس میں ان کا کہنا تھا کہ اے ایف آئی سی کی پہلی اور دوسری رپورٹ میں کوئی فرق نہیں ہے، اگر پرویز مشرف کو مہلک بیماری لاحق تھی تو پہلی رپورٹ میں اس کا ذکر کیوں نہیں کیا گیا، اے ایف آئی سی کی میڈیکل رپورٹ مبہم اور بے نتیجہ ہے۔