بلدیاتی انتخابات ملتوی کیے جائیں، الیکشن کمیشن کی درخواست

بدھ 8 جنوری 2014 14:19

بلدیاتی انتخابات ملتوی کیے جائیں، الیکشن کمیشن کی درخواست

اسلام آباد(اُردو پوائنٹ تازہ ترین اخبار۔ 8جنوری 2014ء) چیف جسٹس پاکستان نے جسٹس تصدق حسین جیلانی نے ریمارکس دیے ہیں کہ بلدیاتی انتخابات غیر معینہ مدت تک تاخیر کا شکار نہیں ہونے چاہئیں۔سیکرٹری الیکشن کمیشن کا کہنا ہے کہ 23 فروری کو سندھ جبکہ 13 مارچ کو پنجاب انتخابات کرائے جا سکتے ہیں۔

(جاری ہے)

سندھ میں نئی حلقہ بندیوں سے متعلق کیس کی سماعت چیف جسٹس تصدق حسین جیلانی کی سربراہی میں تین رکنی بنچ نے کی، الیکشن کمیشن کا موقف تھا کہ سندھ اور لاہور میں نئی حلقہ بندیاں کی گئیں تو شیڈول کے مطابق الیکشن ممکن نہیں ہوگا، بیلٹ پیپرز کی چھپائی کے لیے تین ہفتے درکار ہیں، الیکشن کمیشن سندھ میں فروری جبکہ پنجاب کے بلدیاتی انتخابات مارچ میں کراسکتا ہے، چیف جسٹس نے کہاکہ بلدیاتی انتخابات ضرورہوناچاہئیں، حکومت سندھ کی استدعا پرسندھ ہائی کورٹ کے فیصلے کے خلاف اپیلیں سماعت کے لیے منظور کرلی گئیں۔

عدالتی حکم میں کہا گیاہے کہ سندھ اور پنجاب میں حلقہ بندیوں سے متعلق ہائی کورٹس کے فیصلوں پر اپیلیں 27 جنوری کو سنی جائیں گی۔ چیف جسٹس نے کہا کہ سندھ ہائی کورٹ کا فیصلہ معطل نہیں کیا گیا۔