فٹبال کی دنیا میں لیجنڈ سمجھے جانے والے پرتگال کے معروف فٹ بالر یوسیبیو انتقال کرگئے

پیر 6 جنوری 2014 13:16

موزمبیق (اُردو پوائنٹ تازہ ترین اخبار۔ 6جنوری 2014ء) فٹبال کی دنیا میں لیجنڈ سمجھے جانے والے پرتگال کے معروف فٹ بالر یوسیبیو 71 سال کی عمر میں انتقال کرگئے ہیں۔میڈیا رپورٹ کے مطابق ان کی موت پر اظہار تعزیت کرنے والوں میں موجودہ دور کے فٹبال آئیکن کرسٹیانو رونالڈو پیش پیش تھے۔یوسیبیوٴ نے 1966 کے ورلڈ کپ میں سب سے زیادہ گول کیے تھے۔ان کی پیدائش 1942 میں موزامبیق میں ہوئی اس وقت یہ ملک پرتگال کا حصہ ہوا کرتا تھا۔

یوسیبیوٴ دا سلوا فریرا نے پرتگال کی جانب سے 64 میچ کھیلے جن میں انھوں نے 41 گول کیے۔ 1966 میں انگلینڈ میں ہونے والے عالمی کپ مقابلوں میں انھوں نے کل نو گول کیے تھے جن میں سے چار گول شمالی کوریا کے خلاف میچ میں کیے تھے۔انھیں عالمی سطح پر ہر زمانے کے بہترین کھلاڑی میں سے ایک شمار کیا جاتا ہے۔

(جاری ہے)

انھوں نے 745 پروفیشنل میچوں میں مجموعی طور پر 733گول داغے۔

انھیں کھیل کی رفتار بڑھانے، تیزی کے ساتھ گول پر حملہ کرنے، چکمہ دینے، ڈربل کرنے کیلئے یاد کیا جاتا رہا ہے۔ انھیں ان کے بہترین کھیل کے لیے سنہ 1965 میں بہترین یورپی فٹبالر کے اعزاز سے نوازا گیا تھا۔بنفیکا فٹ بال کلب کی جانب سے کھیلتے ہوئے انھوں نے 1962 میں یورپی کپ جیتا تھا۔ انھوں نے فٹبال کلب کے اپنے پندرہ سال کے کریئر میں 10 لیگ اور پانچ پرتگالی کپ میں جیت حاصل کی۔وہ سنہ 1964 سے 1973 کیدوران پرتگال کے سب سے زیادہ گول کرنے والے کھلاڑی بھی رہے۔عالمی کپ میں ان کی بہترین کارکردگی کی وجہ سے پرتگال کو تیسری پوزیشن حاصل رہی تھی اور وہ سیمی فائنل میں میزبان انگلینڈ سے ہار گئی تھی۔