دامن خالی، ہاتھ بھی خالی،دست ِطلب میں گردِ طلب

بدھ 27 مئی 2015

Muhammad Akram Awan

محمد اکرم اعوان

لاکھوں لوگ دُنیا وی مال ومتاع حاصل کرنے یانرم الفاظ میں یوں کہہ لیں،آنکھوں میں اہل وعیال کی آسودگی کے سپنے سجائے وطن کی مٹی،ماں باپ کی شفقت اوربیوی بچوں کاساتھ قربان کرکے دوسرے ممالک کا رخ کرتے ہیں،پھر زندگی کا بیشترحصہ اپنوں سے جدائی کی اذیت برداشت کرتے ہیں۔ اپنے حصے کی خوشیوں کی قربانی کے ساتھ ساتھ پرائے دیس کاہرغم اوردُکھ خاموشی سے برداشت کرلیتے ہیں۔

البتہ میرامعاملہ بالکل مختلف ہے،80,75 کے پیٹے میں اس بزرگ نے پُرنور چہرہ پرکسی معصوم بچے جیسی مسکراہٹ سجائے شفقت اور محبت سے ہمیں بتایا کہ آج سے کم وبیش55,50 سال قبل ایسے ہی حسین سپنوں کی تعبیرکے لئے ہندوستان سے ہجرت کرکے سعودی عرب کے دارالخلافہ ریاض سے تقریباََ140کلومیڑ کے فاصلہ پرایک چھوٹے سے قصبہ رماح (Rumah) میں کام کی غرض سے آیااوریہیں کا ہوکررہ گیا۔

(جاری ہے)


پھر گفتگو جاری رکھتے ہوئے کہا،ہمارا منصوبہ کچھ ہوتا ہے،مگراللہ کے ہاں کچھ اورطے ہوچکاہوتاہے۔ ہمیں تندرستی،بیماری،خوشی،غم ، فراخی، تنگدستی ہرحال میں اللہ کا شکرادا کرنا چاہیے کہ وہی تما م تعریف کا حقیقی حقدار ہے۔ہرحال اللہ کی طرف سے آتا ہے۔ ہمیں چاہیے کہ ہر حال میں صرف اور صرف اُسی کی طرف متوجہ ہوں۔اپنی ہراُمیداللہ کی ذات پاک ہی سے وابستہ کریں اورہرحال میں اُسی ذاتِ کامل واقدس کی طرف رجوع کریں۔

محمدعربی ﷺکی حیاتِ مبارکہ ہمارے لئے بہترین نمونہ ہے ،صرف اورصرف آپ ﷺ کی اتباع میں دوجہاں کی کامیابی کادارومدار ہے۔ ان کی ساری گفتگو ایمان ویقین ،اللہ عزوجل کی کامل صفات اور محمد مصطفی ﷺ کی حیات مبارکہ سے متعلق تھی۔
اُنہوں نے بتا یا کہ میں تقریباََ 25,20سال کا تھا جب یہاں آیا۔میراتعلق ہندوستان کے کٹراورمتعصب ہندوگھرانے سے ہے۔

ہمارے قبیلے والے اسلام کی مخالفت میں پورے علاقہ میں مشہورہیں۔اسلام قبول کرنے سے قبل کی زندگی پرپشیمانی کااظہار کرتے ہوئے ،ایمان لانے پرخوشی اورفخرکے ساتھ دائرہ اسلام میں داخل ہونے کا واقعہ سنایا کہ بے شک اللہ پاک جس سے محبت کرتا ہے اورجس کے لئے پسندکرتاہے ہدایت کی راہیں کھول دیتا ہے۔میں یہاں آیاتواتفاق سے میرا کام ایک مسجد کے قریب تھا۔

میں روزدیکھتا کہ جیسے ہی بلانے والا سپیکر پر لوگوں کو بلاتا یعنی موئذن اذان دیتا ، لوگ اپنے سارے کام چھوڑ کر مسجد کی جانب چلے جاتے اور تھوڑی دیر (یعنی نماز کی ادائیگی )کے بعدواپس آجاتے اور اپنے کاروبار میں نئے سرے سے مصروف ہوجاتے۔ میں لوگوں کے اس عمل سے متعجب ہوتا کہ آخراس طرح انہیں کیا حاصل ہوتا ہے؟جوروزانہ کئی باراپنا کام اورکاروبار چھوڑ کرمسجدمیں چلے جاتے ہیں۔

ایک دن ڈرتے سہمتے ہوئے میں بھی مسجد چلاگیااور مسجدکے آخری حصہ میں جا کرخاموشی سے بیٹھ گیا۔
اس علاقہ کے لوگ مجھے اچھی طرح جانتے تھے کیونکہ اُس وقت یہ قصبہ بالکل چندگھروں پرمشتمل تھا۔انہیں یہ بھی معلوم تھاکہ میں غیرمسلم ہوں۔ مگران میں سے کسی نے بھی مجھے نہ توحقارت کی نظر سے دیکھا اور نہ ہی مجھ سے کبھی سوال کیا کہ مسجد میں تمھارا کیا کام؟آخرتم یہاں کیا کررہے ہو؟ یہاں تک کہ میں کم وبیش چھ ماہ تک اسی طرح متواتر مسجدمیں جاتا رہا۔

خاموشی سے مسجدمیں جاکر بیٹھ جاتا اورانہیں اللہ کے حضورحاضری دیتے غورسے دیکھتارہتا۔آخرکار اللہ رب العزت نے مجھ پر ترس کھایا ، میرے دل میں دین ِ اسلام کی محبت ڈال دی اور مجھے دین اِسلام جیسی نعمت سے سرفراز کیا۔ مگر اس کے ساتھ ہی میرے لئے ایک اور مشکل کھڑی ہوگئی کہ جیسے ہی میرے بیوی بچوں اورخاندان والوں کو اسلام قبول کرنے کا علم ہوا۔

میرے خاندان والے میرے خلاف ہوگئے اور مجھے قبول کرنے سے انکار کردیا۔میرے خونی رشتہ دار میرے خون کے پیاسے ہوگئے اور مجھے کہا گیا کہ میں گھرآیا تو قتل کردیا جاؤں گا۔
یہ میرے لئے بہت بڑی آزمائش تھی۔میں بیوی بچوں اور اہل خاندان سے جدا ہوکربہت دُکھی اور افسردہ تھا۔، مگرمیں اپنے اللہ پاک سے ہمیشہ دُعا کرتا،اے میرے رب مجھے اس مشکل میں بے آسرا نہ چھوڑنا، میری مددفرمانا اور ہدایت کے بعد مجھے دین اسلام پرثابت قدم رکھنا۔

بے شک اللہ عزوجل نے میری مددفرمائی اورمجھے دین ِاسلام پراستقامت عطاء فرمائی ،جس کامیں جتنا شکرادا کروں کم ہے۔میں نے ہرحال میں اللہ عزوجل کو شامل حال پایا اور کبھی بھی اپنے آپ کو تنہا،بے بس اوربے آسرا محسوس نہیں کیا۔حالانکہ انہیں اپنوں سے بچھڑے اک مدت بیت چکی تھی،ضبط کے باوجودان کی آنکھوں میں نمی صاف بتارہی تھی کہ وطن ،ماں باپ اوراولاد کی کشش کتنی ظالم ہوتی ہے۔


ضعف،بڑھاپا،جسم کا دایاں حصہ فالج زدہ،چلنے میں دشواری، کہ چھڑی زمین پرٹیک کربڑی مشکل اورتکلیف سے پاؤں زمین پرگھسیٹتے ہوئے مسجدمیں باقاعدگی سے نمازکی باجماعت ادائیگی اور عصر سے عشاء تک مسجدمیں اعتکاف کی نیت سے ذکر وفکرکے ساتھ اپنے رب کی بارگاہ میں حاضری دیناسالہاسال سے ان کامعمول ہے۔ اللہ اور اُس کے رسول ﷺ کی محبت میں گزرے ماہ وسال میں پیش آنے والے واقعات ومعجزات اوراپنے پراللہ کے لطف وانعامات کے بارے میں بتا تے ہوئے کئی باروہ رودیئے۔

اُن کی زیارت ہمارے لئے بہت بڑا شرف واعزازتھی۔ اُن کی ایمان افروزداستان سنتے ہوئے،میری آنکھیں اشک بارتھیں ،مجھے اپنے آپ پرافسوس ہورہا تھا!کہ اخترہوشیارپوری نے شاید میرے لئے لکھاتھا!
دامن خالی ، ہاتھ بھی خالی، دست ِ طلب میں گرد ِ طلب
عمرِ گریزاں ! عمرِگریزاں ! مجھ سے لپٹ اور مجھ پر رو
بڑھاپے ،کمزوری اوربیماری کی حالت میں اپنوں اورخاص کراولادکی ضرورت کے وقت، تنہائی کس قدراذیت ناک ہوتی ہے، اس درد کا اندازہ، جس پر بیتے وہی کرسکتا ہے۔

ان کی میٹھی اورمحبت بھری آوازکے احساس نے میرے جسم میں کپکی طاری کردی اورمیں اسی سحرکی کیفیت میں سوچتارہاکہ یہ شخص دین کی خاطرکتنی بڑی آزمائش سے گزرا ہے۔ہم پیدائشی مسلمان ہیں،ہمیں ماں کی گود میں کلمہ مل گیا،ہم نے اس نعمت کی قدر نہ کی۔ہم لوگ دُنیا وی مال ومتاع اوردووقت کی روٹی کی خاطر وطن کی مٹی،ماں باپ کی شفقت اوربیوی بچوں کاساتھ قربان کر دیتے ہیں مگردین کی خاطرقربانی ہمیں خیال اور افسانہ محسوس ہوتی ہے۔


ہم نے اسلام جیسے آفاقی دین کواپنی ضرورت کے تحت فرقوں میں تقسیم اورمحدود کردیا ہے کہ ہمارے مسلک کے علاوہ سبھی کافر،جہنمی اورواجب القتل ہیں ۔ ہماری مسجدمیں کوئی غلطی سے نماز پڑھ لے تو ہم مسجد پاک کرنے کے لئے اُس جگہ کو غسل دیتے ہیں کہ دوسرے مسلک سے تعلق رکھنے والے شخص کے داخل ہونے سے ہماری مسجدناپاک ہوگئی ہے۔پھر جب نماز کا وقت ہوتاہے توجماعت سے پہلے کہا جاتا ہے،صف اچھی طرح درست کرلیں، ایڑی کے ساتھ ایڑی اور ٹخنوں کے ساتھ ٹخنے ملالیں۔

درمیان میں کوئی جگہ خالی نہ رہے۔صف سیدھی نہ ہوئی تو اللہ ہمارے دلوں کو پھیرد ے گایعنی "ہمارے دلوں میں ایک دوسرے کے خلاف نفرت پیدا کردے گا"۔سوچنے کی بات ہے کہ ہم جواشتعال انگیز تقریریں کرتے ہیں، ہم جونفرت آمیزتحریریں لکھتے ہیں، ہم دن را ت معاشرے میں عدم برداشت کاجو زہرگھول رہے ہیں،ہم جودوسروں کوکافر،جہنمی اورواجب القتل قراردے رہے ہیں،کیا اس سے دل جڑ جائیں گے اورایک دوسرے سے محبت پیدا ہوجائے گی؟ہمیں یہ خیال کیوں نہیں رہتاکہ جس آنگن میں نفرت کے بیج بوئے جاتے ہیں ، وہاں محبت کے پھول کبھی نہیں کھلتے۔کیا کوئی "غیرمسلم ،,محمدشفیع بننے سے پہلے" اِسلام کے نام پرطلب وحاصل کئے گئے پاکستان کی کسی مسجدمیں جاکر۔۔۔تھوڑی دیرکے لئے بیٹھ سکتا ہے؟

ادارہ اردوپوائنٹ کا کالم نگار کی رائے سے متفق ہونا ضروری نہیں ہے۔

تازہ ترین کالمز :