ڈی سی اوآفس ملتان کے ریکارڈروم میں آتشزدگی ،عدالتی ریکارڈجل گیا، میٹروبس منصوبے کاریکارڈمحفوظ ہے، ڈی سی او

بدھ 21 دسمبر 2016 20:53

ملتان۔21 دسمبر(اُردو پوائنٹ اخبارتازہ ترین - اے پی پی۔ 21 دسمبر2016ء) ڈی سی اوآفس ملتان میں بدھ کے روز آتشزدگی کے نتیجے میں سول اورسیشن کورٹس کاریکارڈخاکسترہوگیا۔ تاہم میٹروبس منصوبے کاریکارڈمحفوظ رہا۔آگ ساڑھے گیارہ بجے صبح لگی جس کے بعد ریسکیو1122کی ٹیمیں موقع پرپہنچ گئیں۔آگ سے ریکارڈروم کی چھت منہدم ہوگئی ۔فائربریگیڈکے عملے نے موقع پرپہنچ کرڈیڑھ گھنٹے بعدآگ پرقابوپایا۔

ذرائع کے مطابق آتشزدگی کے نتیجے میں سول اورسیشن عدالتوں کے 1995سے پہلے کے مقدمات اورفیصلوں کاریکارڈجل کرراکھ ہوگیا۔آگ اردومحافظ برانچ میں بھڑکی جہاں فیصلوں کاریکارڈرکھاجاتاہے ۔ڈی سی اوملتان نادرچٹھہ کے مطابق آتشزدگی سے ریونیوریکارڈاورمیٹروبس منصوبے کاریکارڈمتاثرنہیں ہوا۔

(جاری ہے)

آتشزدگی کے بعد کچہری اوراس کے اردگردکے تمام راستوں کو بندکردیاگیاجس کے نتیجے میں کچہری فلائی اوورسے کلمہ چوک اور9نمبرتک ٹریفک کی قطاریں لگ گئیں ۔

تاہم آگ بجھنے کے بعد راستے کھول دیئے گئے ۔ڈی سی اوملتان نادرچٹھہ نے آتشزدگی کی تحقیقات کاحکم دیدیاہے اوراس سلسلے میں تحقیقاتی کمیٹی بھی تشکیل دیدی گئی ہے۔’’اے پی پی ‘‘سے بات چیت کرتے ہوئے ڈی سی اونادرچٹھہ نے کہاکہ ہم اس واقعہ کے محرکات کاجائزہ لے رہے ہیں اگراس میں کوئی انسانی ہاتھ ملوث ہوا توسخت کاروائی کی جائے گی ۔