صولت مرزا گرفتار ہونے سے قبل الطاف حسین سے رابطے میں تھے : صولت مرزا کی اہلیہ کا انکشاف

پیر 30 مارچ 2015 22:49

صولت مرزا گرفتار ہونے سے قبل الطاف حسین سے رابطے میں تھے : صولت مرزا کی اہلیہ کا انکشاف

کراچی (اُردو پوائنٹ اخبارتازہ ترین۔30مارچ۔2015ء) ‬‎ صولت مرزا کی اہلیہ کی جانب سے سنسنی خیز انکشافات سامنے آئے ہیں۔ صولت مرزا کی اہلیہ نے انکشاف کیا ہے کہ صولت مرزا گرفتاری سے قبل متحدہ کے قائد الطاف حسین سے مسلسل رابطے میں تھے، یہ کہنا کہ صولت مرزا کا متحدہ سے کوئی تعلق نہیں ایک سنگین مذاق ہے۔ انہیں نظریہ کے نام پر استعمال کیا گیا اور پھر پھینک دیا گیا ہے۔

متحدہ کی جانب سے صولت مرزا سے اظہار لاتعلقی کے اعلان کے بعد انہیں متحدہ کے مرکز نائن زیرو پر دوبارہ جانے نہیں دیا گیا۔ انہوں نے متعدد بار نائن زیرو جانے کی کوشش کی تاہم انہیں مکا چوک سے آگے جانے نہین دیا گیا۔ فاروق ستار کی جانب سے انہیں کال پر کہا گیا کہ اب ان کا صولت مرزا سے کوئی تعلق نہیں رہا لہذا اب آپ جانیں اور آپ کا کام۔

(جاری ہے)

متحدہ کی جانب سے صولت سے اظہار لاتعلقی اختیار کرنے کیلئے ان پر ایجنسیوں سے پیسے لے کر ملک واپس آنے کا الزام لگایا گیا۔

ان کا مزید کہنا تھا کہ جب وہ صولت مرزا سے ملاقات کیلئے جاتی تھیں تو ان کی ملاقات کا انتظام ایک الیحدہ کمرے میں کیا جاتا تھا۔ جیل میں متحدہ کے لڑکوں کو فون کی سہولت بھی حاصل رہی۔ صولت مرزا کے کیس کے حوالے سے متحدہ میں قمر منصور، خالد مقبول صدیقی، انیس قائمخانی اور ڈاکٹر نصرت سے وہ مسلسل رابطے میں رہیں۔ اس سلسلے میں گورنر سندھ عشرت العباد سے بھی متعدد ملاقاتیں ہوئیں۔

صولت مرزا کی رحم کی اپیل مستردہونے کے بعد متحدہ کے رہنماء قمر منصور اور ڈاکٹر نصرت کی جانب سے بہت محنت کی گئی تھی۔ ان کا مزید کہنا تھا کہ صولت مرزا کو جب مچھ جیل منتقل کیا گیا تھا تو ڈاکٹر منصور کی جانب سے ان کے لیے ملاقات کے لیے ٹکٹ کا بندوبست کیا گیا تھا۔ انہوں نے حکومت سے اپیل کی کہ صولت مرزا کو پھانسی پر لٹکانے کی بجائے جن لوگوں نے صولت کو استعمال کیا ان کو سامنے لا کر سزائیں دی جائیں۔

کراچی میں شائع ہونے والی مزید خبریں