کراچی، انسداد دہشت گردی کی عدالت کا تہرے قتل کیس میں گواہان کے بیانات کی دستاویزات غائب ہونے پر شدید برہمی کا اظہار

بدھ 25 فروری 2015 19:22

کراچی(اردو پوائنٹ تازہ ترین اخبار. 25 فروری 2015ء) انسداد دہشت گردی کی خصوصی عدالت کی جج نے لیاری گینگ کے ارشد پپو اور اس کے بھائی یاسر عرفات سمیت تہرے قتل کیس میں گواہان کے بیانات کی دستاویزات غائب ہونے پر شدید برہمی کا اظہار کیا اور تفتیشی افسر کو حکم دیا ہے کہ 12مارچ تک گواہان کے بیانات پیش کئے جائیں جبکہ عدالت نے مقدمہ میں ملوث ملزم عبدالرحمان کی 2لاکھ روپے کی ضمانت منظور کرلی ہے۔

بدھ کو انسداد دہشت گردی کی خصوصی عدالت نے نمبرviiنے مقدمہ کی سماعت کی، مقدمہ میں پاکستان پیپلز پارٹی کے رکن قومی اسمبلی شاہ جہاں بلوچ، زبیر بلوچ، ذاکر ڈاڈا، عبدالرحماناور سابق ایس ایچ او چاکیواڑہ جاوید بلوچ، انسپکٹر یوسف بلوچ شامل ہیں سماعت کے دوران تفتیشی افسر نے عدالت کو بتایا کہ مقدمہ میں گواہان کے بیانات قلم بند کیئے گئے تھے کی اصل دستاویزات غائب ہیں جس پر عدالت نے برہمی کا اظہار کیا اور تفتیشی افسر کو بیانات پیش کرنے کی ہدایت کرتے ہوئے سماعت 12مارچ تک ملتوی کردی۔

(جاری ہے)

واضح رہے کہ فاضل عدالت مقدمہ میں لیاری گینگ کے نور محمد عرف بابا لاڈلہ اور کالعدم امن کمیٹی کے عزیر جان بلوچ سمیت سات ملزمان کو اشتہاری بھی قرار دے چکی ہے ۔استغاثہ کے مطابق ارشد پپو اپنے بھائی یاسر عرفات بیٹے عبدالسدیس اور ساتھی شیرا پٹھان کے ہمراہ 16 مارچ 2013 کو اپنے ایک دوست کے گھر پارٹی میں شرکت کیلئے گئے ،رات 12 بجے کے بعد 12 سالہ بیٹا عبدالسدیس گھر واپس آ یا جس نے اہل خانہ کو بتایا کہ چند لوگ پاپا ،چاچا اور شیرا پٹھان کو اپنے ہمراہ لے گئے ہیں بچے کے مطابق اس نے عزیر جان بلوچ کے بھائی زبیر بلوچ ،نور محمد عرف بابالاڈلہ اس کا بھائی زاہد لاڈلہ ،آصف ،فیصل پٹھان،اور زاکر عرف دادا کو شناخت کرنے میں کامیاب بھی ہوا ہے۔

جبکہ مذکورہ ساری کارروائی شاہجہاں بلوچ کی ایماء پر کی گئی ہے اور ملزمان نے مقتولین کو اغواء کرنے کے بعد کلاکوٹ تھانے کی حدود مرزا آدم خان روڈ پر قتل کردیا اور پولیس کی آمد سے قبل دونوں بھائیوں ارشد پپواور یاسر عرفات کی نعشوں کو جائے وقوعہ سے لے گئے اور ان کی نعشوں کی بے حرمتی کرکے گٹروں میں بہادیا۔ملزمان کے خلاف تھانہ کلاکوٹ میں ایف آ ئی آر نمبر 21/2013 زیر دفعہ 365،302،392،109،297،324،اور7 اے ٹی اے انسداد دہشت گردی ایکٹ کے تحت مقدمہ ارشد پپو کی اہلیہ اسماء کی مدعیت میں درج کیا گیا ہے۔

متعلقہ عنوان :

کراچی میں شائع ہونے والی مزید خبریں